लगातारको बर्षाका कारण काठमाडौं लगायत देशका विभिन्न भागहरु जलमग्न भएको छ । जिल्ला प्रशासन कार्यलय काठमाडौंले निरन्तर वर्षाका कारण सडकहरूमा जोखिम बढेकाले सतर्क रहन आग्रह गरेको छ। शुक्रबारको अविरल वर्षाका कारण थानकोट हुँदै नौविसे(मुग्लिङ(नारायणगढ सडक र बल्खु(दक्षिणकाली(सिस्नेरी सडकमा पहिरोको जोखिम भएकाले सो सडक प्रयोग नगर्नू भन्दै प्रशासन कार्यालयले सूचना पनि जारी गरेको छ।
प्रशासन कार्यालयका अनुसार हाल उक्त सडकखण्डमा सवारी सञ्चालनमा पूर्ण रोक लगाइएको छ। सम्पूर्ण सवारी धनी एवं यात्रुहरूलाई सो सडकखण्ड हुँदै सवारी नचलाइदिन तथा यात्रा नगरी यथास्थानमै बसेर सुरक्षित रहन अनुरोध छ प्रशासन कार्यालयले भनेको छ।
उता ललितपुरको इमाडोल खोलामा पानीको बहाब बढेपछि सडकमै पानी निस्किएको छ। शुक्रबार दिनभरि परेको पानीले इमाडोल खोलाको सतह बढेर सडकमै पानी निस्किएको हो। सडकमा पानी निस्किएपछि सर्वसाधारणलाई आवतजावत गर्न कठिन भएको छ।
बागमती नदी किनाराका बल्खुलगायत क्षेत्रका घरमा बाढी पसेको छ। त्यहाँको तरकारी बजार पनि डुबानमा परेको छ। त्यस्तै साँझ सवा छ बजेतिर वनस्थलीमा खोलाले मोटरसाइकल बगाउँदा एक जना चालक बेपत्ता भएका छन्। उनको खोजी कार्य भइरहेको प्रहरीले जनाएको छ। काठमाडौं छिर्ने मुख्य राजमार्गहरु प्रभावित भएका छन । सयौ स्थानमा पहिरोले बाटो पुरेको बताइएको छ ।
