अमेरिकी राष्ट्रपति डोनाल्ड ट्रम्प र रुसी राष्ट्रपति भ्लामिदिर पुटिनबीच आगामी शुक्रबार आलास्कामा भेटवार्टा हुने भएको छ । यो भेट विश्व राजनीतिमा निकै अर्थपुर्ण रुपमा हेरिएकोछ । डोनाल्ड ट्रम्पले भनेका छन् कि उनी अर्को हप्ता युक्रेनको युद्धबारे छलफल गर्न रुसी राष्ट्रपति भ्लादिमिर पुटिनसँग भेट्नेछन् र तीन वर्ष भन्दा लामो समयदेखि चलिरहेको युद्धको अन्त्यका लागि “केही भू–भागहरूको अदल–बदल” आवश्यक पर्ने बताएका छन् । ट्रम्पले भनेअनुसार, उनी पुटिनसँग भेट गर्न आउँदो शुक्रबार अलास्कामा योजना बनाइरहेका छन् । उनले यो स्थान आफ्नो ट्रुथ सोसल साइटमा छोटो पोस्टमार्फत सार्वजनिक गरेका हुन् ।
त्यसअघि, ट्रम्पले ह्वाइट हाउसमा पत्रकारहरूसँग कुरा गर्दै भने, “यो भेट पहिले नै हुन सक्थ्यो, तर जति सुरक्षा व्यवस्थाहरू मिलाउनु पर्ने हुन्छ, त्यसैले ढिलाइ भयो जस्तो लाग्छ । ” अमेरिकी राष्ट्रपतिले थप भने, “युक्रेन र रुस दुबैको फाइदाको लागि केही भू–भागहरूको अदल–बदल हुनेछ” र यो विषय चाँडै छलफल गरिनेछ, यद्यपि उनले थप विवरण भने बताएनन द गार्जियन समाचारले लेखेको छ ।
ब्लूमबर्गले शुक्रबार रिपोर्ट गरेको छ कि उक्त सहमतिले पुटिनको युक्रेनमा हासिल गरेका केही भू–भागहरूलाई औपचारिकता दिन सक्छ, जसको अर्थ खेरसोन र जापोरीझिया क्षेत्रहरूमा युद्धको रेखा स्थिर पारिन सक्छ । पुटिनले युक्रेनका चार क्षेत्रहरूमा आफ्नो दाबी गरेका छन्, यद्यपि ती क्षेत्रहरूको धेरै हिस्सा अझै युक्रेनी नियन्त्रणमै छ ।
ब्लूमबर्गका अनुसार, अमेरिकी र रुसी अधिकारीहरू यस्तो सहमतिको तयारीमा छन्, जसअन्तर्गत रुसले आफ्नो आक्रमण रोक्ने सन्दर्भमा केही भू–भागहरूमा यथास्थितिको स्वीकारोक्ति पाउनेछ जुन युक्रेनभित्र राजनीतिक रूपमा निकै विवादास्पद प्रस्ताव बन्न सक्छ । ट्रम्प यसअघि नै पूर्वशर्तबिनै पुटिनसँग प्रत्यक्ष भेट गर्न तयार रहेको बताइसकेका छन्, जसमा पुटिन र जेलेंस्कीबीच प्रत्यक्ष वार्ताको सम्भावना पनि समावेश छ । यसले केही चिन्ता बढाएको छ कि युक्रेनलाई संभावित युद्धविरामको प्रारूपमा वार्ताबाट बाहिर राखिनेछ । यदि यो सम्मेलन हुन्छ भने, यो सन् २०२१ पछि पहिलो अमेरिका–रुस शिखर सम्मेलन हुनेछ, जब तत्कालीन राष्ट्रपति जो बाइडेनले जिनेभामा पुटिनसँग भेट गरेका थिए ।
अमेरिकी दूत स्टिभ विटकोफले ट्रम्प, पुटिन र जेलेंस्कीबीच त्रिपक्षीय बैठकको प्रस्ताव गरेका थिए, तर पुटिनका सहयोगी युरी उशाकोभका अनुसार क्रेमलिनले उक्त प्रस्तावलाई बेवास्ता गरेको छ र “पहिलो चरणमा ट्रम्पसँग द्विपक्षीय भेटको तयारीमा केन्द्रित भएको” बताएका छन् । पुटिनले भनेका छन् कि उनी जेलेंस्कीसँग भेट्न तयार छैनन्, यद्यपि क्रेमलिनले भने ट्रम्पसँगको द्विपक्षीय शिखर सम्मेलनको तयारी भइरहेको दाबी गरेको छ ।
गत महिना ट्रम्पले पुटिनलाई युद्धविरामको लागि सहमत हुन अन्तिम चेतावनी दिएका थिए, नत्र उनले दोस्रो तहको प्रतिबन्ध लागु गर्ने बताएका थिए, जसको समयसीमा यही शुक्रबार तोकिएको थियो । यो चेतावनी अझै कायम देखिन्छ, यद्यपि शिखर सम्मेलनको योजना सार्वजनिक भइसकेको छ । ह्वाइट हाउसले भने के कस्ता दोस्रो तहका कदमहरू चाल्न सकिन्छ भन्ने खुलाएको छैन ।
