अमेरिकी राष्ट्रपति डोनाल्ड ट्रम्पले सन् २०२१ मा उनका समर्थकहरूले अमेरिकी क्यापिटल भवनमा आक्रमण गर्नुअघि वाशिङ्टनमा दिएको भाषणको सम्पादनलाई लिएर बीबीसीविरुद्ध मुद्दा दायर गरेका छन्। उनले मुद्दामा कम्तीमा ५ अर्ब अमेरिकी डलर क्षतिपूर्तिको माग गरेका छन्।
अमेरिकी राष्ट्रपति ट्रम्पले प्रसारक संस्थाले जनवरी ६ को विद्रोहअगाडि उनले दिएको भाषणलाई “जानीजानी, दुर्भावनापूर्ण र भ्रामक रूपमा” सम्पादन गरेको आरोप लगाएका छन्। यो करिब एक वर्षअघि प्रसारित पानोरामा कार्यक्रमको एक भागमा देखाइएको थियो। लगभग एक घण्टाको फरकमा दिइएका भाषणका अंशहरू जोडेर गरिएको उक्त सम्पादनले ट्रम्पले भीडलाई यसो भनेको जस्तो देखाएको थियो “हामी क्यापिटलतर्फ हिँड्न जाँदैछौँ, म पनि तपाईँहरूसँगै हुनेछु, र हामी लड्छौँ। हामी कडा रूपमा लड्छौँ।”
यसै विवादलाई लिएर बीबीसीका महानिर्देशक टिम डेभी र बीबीसी न्युजकी प्रमुख डेबोरा टर्नेसले यस प्रकरणका कारण गत महिना पदबाट राजीनामा दिएका थिए। ट्रम्पको मुद्दा सोमबार साँझ अमेरिकाको फ्लोरिडाको दक्षिणी जिल्लास्थित संघीय जिल्ला अदालतमा दायर गरिएको हो—जबकि पानोरामा प्रसारण हुने प्रमुख स्ट्रिमिङ प्लेटफर्म बीबीसी आइप्लेयर र मुख्य टेलिभिजन च्यानल बीबीसी वन अमेरिकामा उपलब्ध छैनन्।
ट्रम्पको कानुनी टोलीका एक प्रवक्ताले सन् २०२४ को राष्ट्रपति चुनावभन्दा एक हप्ता अघि प्रसारित उनका भाषणका सम्पादनहरू चुनावमा हस्तक्षेप गर्ने “निर्लज्ज प्रयास” भएको दाबी गरे। “बीबीसीले राष्ट्रपति ट्रम्पसम्बन्धी समाचार कभरेजमा आफ्ना दर्शकहरूलाई धोका दिने लामो इतिहास बोकेको छ, जुन सबै उसको आफ्नै वामपन्थी राजनीतिक एजेन्डाको सेवामा गरिएको हो,” प्रवक्ताले भनेका छन। “राष्ट्रपति ट्रम्पको शक्तिशाली मुद्दाले बीबीसीलाई उसको मानहानी र लापरवाह चुनावी हस्तक्षेपका लागि जवाफदेही बनाइरहेको छ, ठीक त्यही तरिकाले उनले अन्य नक्कली समाचार प्रवाह गर्ने मुख्यधारका सञ्चारमाध्यमहरूलाई पनि उनीहरूको गलत कार्यका लागि जिम्मेवार बनाउँदै आएका छन्।”
ट्रम्पले सोमबार यस मुद्दाबारे पहिले नै सङ्केत दिएका थिए। ओभल अफिसमा पत्रकारहरूसँग कुरा गर्दै उनले भनेका थिए, “केही बेरमा तपाईंहरूले देख्नुहुनेछ, म बीबीसीविरुद्ध मुद्दा हाल्दै छु, किनकि उसले मेरो मुखमा शब्द हालिदिएको छ। साँच्चै, उसले मेरो मुखमा शब्द हालिदियो। उसले मैले कहिल्यै नबोलेका कुरा बोलेको जस्तो देखायो।”
