क्यानडा ब्रिटिस कोलम्बियाको लेजिस्लेटिभ एसम्बलीद्धारा मे २९ लाई हरेक बर्ष नेपाल हेरिटेज डे मनाउने घोषणा गरेको छ । क्यानडाका लागि नेपाली राजदुत भरतराज पौडेलको उपस्थितिमा स्थानीय नेपाली संघसस्थाहरु नेपाली कम्यूनिटि सोसाईटि अफ ब्रिटिस कोलोम्बिया, हिन्दु बुद्धिष्ट फाउण्डेसन भ्यान्कुभर, नेपाली सोसाईटि अफ भिक्टोरियाको पहलमा भोली शनिबार बिशाल कार्यक्रमकाबीच हेरिटेज डे मनाउने तयारी भईरहेको हो ।
हेरिटेज डे घोषणाको लागि क्यानडा सरकारद्धारा जारी प्रोकेमेसन स्थानीय नेपाली समुदायले प्राप्त गरेपछि खुसीयाली व्यक्त गरेका छन । क्यानडाका लागि नेपाली राजदुत पौडेलले सोही अवसरमा ब्रिटिस कोलम्बियाका सभामुख राज चौहानसंग भेटघाट गर्नु भएको थियो । सोही अवसरमा राजदुत पौडेलले ब्रिटिस कोलम्बियाका रोजगार तथा आर्थिक विकासमन्त्रि रवि काहलोसंग पनि भेटघाट गर्नु भएको छ ।
दुवै भेटघाटमा राजदुत पौडेलले नेपाल क्यानडा सम्बन्ध र क्यानडामा रहेका नेपालीको अवस्था तथा नेपालमा उत्पादित वस्तुलाई क्यानडामा बजार प्रवर्धन संभवनाहरुको बारेमा छलफल भएको र क्यानडा सरकार नेपालमा उत्पादित वस्तुको बजार प्रबद्धनका लागि सकारात्मक रहेको खबरमालासंग बताउनु भयो । शानिबार हुने कार्यक्रमका लागि राजदुत पौडेलले स्थानिय नेपाली समुदायका नेतृत्वकर्ताहरुसंग भेटघाट तथा छलफलमा जुटेका छन । यो नेपालीहरुका लागि निकै महत्वपुर्ण तथा उपलब्धिपुर्ण काम भएको राजदुत पौडेलको भनाई रहेको छ ।
