क्यानाडाको अन्टारियोस्थित एउटा हाइवेमा गुडिरहेको कार दुर्घटनामा परी त्यसमा आगो लाग्दा दुई जना नेपाली विद्यार्थीको ज्यान गएको प्रारम्भिक सूचना प्राप्त भएको छ। यो हिजो उज्यालो नहुँदैको घटना हो। अन्टारियो प्रहरीलाई उद्यृत गर्दै क्यानेडियन सञ्चारमाध्यमहरुले जनाएअनुसार, हाइवे ४०० मा जुन ११ तारिख बिहीबार बिहानका राती भएको दुर्घटनामा एक युवती र अर्का युवकको ज्यान गुमेको हो।

दुर्घटना भएको स्थान सिक्स माइल लेक प्रादेशिक पार्कको ठीक उत्तर र मस्कोका रोड ३८ भन्दा केही दक्षिणमा पर्छ। यो क्षेत्र ब्यारीभन्दा झन्डै ७५ तथा टोरन्टोबाट १६० किलोमिटर उत्तरमा पर्छ। गुडिरहेको कार दुर्घटनामा परेपछि आगो लाग्दा त्यसमा सवार ती युवती र युवकको घटनास्थलमै ज्यान गएको अन्टारियो प्रहरीलाई उद्यृत गर्दै स्थानीय सञ्चारमाध्यमले जनाएका छन्।
उनीहरु टोरन्टोबाट थन्डर वे फर्किनेक्रममा दुर्घटनामा परेका थिए। विद्यार्थी भिसामा क्यानाडा आएर टोरन्टोस्थित फ्लेमिङ् कलेजमा अध्ययन पूरा गरेका उनीहरु काम र अरु अवसर खोजीमा थन्डर वे बस्दै आएका थिए। फ्लेमिङ् कलेजमा जुन ९ र १० तारिखमा दीक्षान्त समारोह थियो। त्यसमा सहभागी भइ फर्किनेक्रममा उनीहरु सवार कार दुर्घटनामा परेको बुझिएको छ। दुई नेपाली विद्यार्थीको ज्यान गुमेको यो दुर्घटनाबारे गैर आवासीय नेपाली संघ ९ एनआरएनए क्यानाडा० लाई जानकारी भइसकेको छ।

एनआरएनए क्यानाडाका अध्यक्ष जगन सापकोटाले युवतीको शव नेपाल पठाउनेबारे प्रारम्भिक कुरा चलिरहेको ुनेपाल टचुलाई जानकारी दिए। युवक पक्षका अभिभावक भने स्वयं टोरन्टो आएर घटनाबारे बुझिरहेको सूचना पाएको सापकोटाले बताए। काठमाडौंबाट अभिभावक र आफन्तले सम्पर्क गरेर युवतीको शव उतै पठाइदिन आग्रह गर्नुभएको छ, अध्यक्ष सापकोटाले भने, यसका लागि थुप्रै प्रक्रिया, समय र खर्च लाग्छ। त्यसका लागि काम गर्न सुरु गरेका छौं।

उनीहरुको शव टोरन्टोस्थित एउटा अस्पतालमा राखिएको छ। सउदर्न जर्जियन बे ओपिपीका अनुसार, जुन ११ बिहीबार बिहान ३ बजेपछि हाइवे ४०० को उत्तरतर्फ जाने लेनमा एउटा एसयुभी दुर्घटनामा परी आगो लागेको आकस्मिक सूचना प्रहरीलाई प्राप्त भएको थियो। सूचना पाउनसाथ उद्धार टोली र प्रहरी अधिकारीहरू घटनास्थलमा पुगेका थिए। प्रहरीका अनुसार कारमा सवार दुवै जनालाई घटनास्थलमै मृत घोषित गरिएको थियो। दुर्घटनाको गम्भीरतालाई हेर्दै ओपिपीको ट्राफिक युनिटले घटनास्थलमा प्राविधिकहरू खटाएर विस्तृत अनुसन्धान सुरु गरेको थियो। अनुसन्धानका लागि राजमार्ग ४०० को ह्वाइट फल्स रोड र मस्कोका रोड ३८ बीचको खण्ड धेरै घण्टासम्म पूर्ण रूपमा बन्द गरिएको थियो। अहिले पूर्ण रूपमा पुनः सञ्चालनमा आइसकेको छ। source nepaltouch online