नेपाल सरकारले पोर्चुगललाई काठमाडौंमा काउन्सिलर कार्यालय खोल्न सहमति प्रदान गरेको छ । साउन २६ गते बसेको मन्त्रिपरिषद्को बैठकले सो सहमति दिने निर्णय गरेको हो । “पोर्चुगल सरकारलाई काठमाडौंमा काउन्सिलर कार्यालय खोल्न सहमति दिने,” मंगलबार सार्वजनिक गरिएको मन्त्रिपरिषद्को निर्णयमा भनिएको छ ।
पछिल्लो समय अध्ययन र वैदेशिक रोजगारीमा जाने नेपालीहरूको लागि पोर्चुगल आकर्षक गन्तव्य बन्दै आएको छ । पोर्चुगलमा ७० हजारभन्दा बढी नेपालीहरू रहेको अनुमान छ । नेपालमा पोर्चुगलको दूतावास नहुँदा पोर्चुगल जान चाहनेले भिसाको लागि भारतको नयाँ दिल्लीस्थित पोर्चुगलको दूतावास धाउनुपर्ने बाध्यता रहँदै आएको छ । पोर्चुगलले काठमाडौंमा काउन्सिलर कार्यालय खोलेपछि अब यो झन्झटबाट नेपालीहरू मुक्त हुनेछन् ।
परराष्ट्रमन्त्री शिशिर खनालले मन्त्रालयको जिम्मेवारी सम्हालेलगत्तै १ अप्रिल २०२६ मा पोर्चुगलका विदेशमन्त्री पाउलो रंगेलसँग टेलिफोन वार्ता गरेका थिए । सोही वार्ताका क्रममा पोर्चुगलका विदेशमन्त्रीले काठमाडौंमा काउन्सिलर कार्यालय खोल्ने घोषणा गरेका थिए ।
त्यसपछि २९ अप्रिलदेखि १ मे २०२६ सम्म नेपाल भ्रमणमा आएकी पोर्चुगलकी उप–विदेशमन्त्री डा। आना इसाबेल जेभियरले काठमाडौंमा काउन्सिलर कार्यालय खोल्ने प्रक्रिया अघि बढाएकी थिइन् । परराष्ट्रमन्त्री खनालले भेटमा उनलाई काउन्सिलर कार्यालय स्थापना गर्न नेपाल सरकारको पूर्ण सहयोग रहने आश्वासन दिएका थिए ।
काठमाडौंमा पोर्चुगल कन्सुलर कार्यालय स्थापना गर्ने निर्णय गरेपछि गैरआवासीय नेपाली संघ (एनआरएनए) पोर्चुगलले उक्त निर्णयको स्वागत गर्दै नेपाल तथा पोर्चुगल सरकारप्रति आभार व्यक्त गरेको छ ।
नेपाल सरकारको २०८३ साउन २६ गते बसेको मन्त्रिपरिषद् बैठकले पोर्चुगल सरकारलाई काठमाडौंमा कन्सुलर कार्यालय खोल्न सहमति दिने निर्णय गरेको थियो । निकट भविष्यमा नै कार्यालय सञ्चालनमा आउने अपेक्षा गरिएको एनआरएनए पोर्चुगलले जनाएको छ ।
एनआरएनए पोर्चुगलका अध्यक्ष सुजन लामा मोक्तानले जारी गरेको विज्ञप्तिमा काठमाडौंमै पोर्चुगलको कन्सुलर कार्यालय सञ्चालनमा आएपछि पोर्चुगलमा रहेका नेपालीलाई विभिन्न कन्सुलर सेवा लिन सहज हुने उल्लेख गरिएको छ । विशेषगरी पारिवारिक पुनर्मिलन, भिसा तथा अन्य कन्सुलर सेवाका लागि हाल भारतको नयाँ दिल्लीसम्म पुग्नुपर्ने बाध्यता कम हुने संघको विश्वास छ ।
