परराष्ट्रमन्त्री आरजु राणा देउवा र भारतीय प्रधानमन्त्री नरेन्द्र मोदीबीच सोमबार भेटवार्ता हुने भएको छ । राणा भारतीय विदेशमन्त्री एस जयशंकरको निमन्त्रणामा भारत भ्रमणमा छिन् । परराष्ट्रमन्त्री नियुक्त भएपछि उनको यो पहिलो विदेश भ्रमण हो । आइतबार नयाँदिल्ली पुगेकी मन्त्री राणालाई इन्दिरा गान्धी अन्तर्राष्ट्रिय विमानस्थलमा भारतका लागि नेपालका कार्यवाहक राजदूत सुरेन्द्र थापा र भारतीय विदेश मन्त्रालयका नेपाल र भुटान डेस्क प्रमुख अनुराग श्रीवास्तवले स्वागत गरे ।
भ्रमणका क्रममा मन्त्री राणाले भारतीय समकक्षी विदेशमन्त्री जयशंकरसँग सोमबार दिउँसो भेटवार्ता हुने कार्यक्रम तय भएको परराष्ट्र मन्त्रालयले जनाएको छ । ‘दुई देशको आपसी हित, सहकार्य तथा थप सम्बन्ध विस्तारका विषयमा सो द्विपक्षीय वार्ताका क्रममा छलफल हुनेछ,’ मन्त्रालयले उल्लेख गरेको छ । मन्त्री राणाको भ्रमण दलमा परराष्ट्र मन्त्रालयको दक्षिण एसिया महाशाखा प्रमुख सहसचिव भृगु ढुंगानालगायत सहभागी छन् । राणा भदौ ६ मा स्वदेश फर्कनेछिन् । आरजु राणा देउवा परराष्ट्र मन्त्रालयको जिम्मेवारी सम्हालेको एक महिनापछि छिमेकी भारतको औपचारिक भ्रमणमा निस्किएकी हुन । नेपालका राजनीतिक दल र नेताप्रति दुवै छिमेकीले अविश्वास गरिरहेको समयमा परराष्ट्रमन्त्री राणा नयाँदिल्ली जानुलाई सम्बन्ध सुधारको एक प्रयासका रुपमा लिइएको छ । केही वर्षयता नेपालका राजनीतिक दल र नेतालाई भारत, चीन र अमेरिकाले शंकाको दृष्टिबाट हेरिरहेको भनिएका बेला वतर््मान सरकारका लागि दक्षिणको सम्बन्धमा आएको केहि आशंका मेट्ने कूटनीतिक क्षेत्रका जानकारहरू बताउँछन्। कूटनीतिक क्षेत्रमा आरजुले भारत भ्रमणका लागि जनैपूर्णिमा चयन गर्नुले फेरि ‘राखी कूटनीति’ को चर्चा हुन थालेको छ।
