अस्ट्रेलियाको सिड्नीमा आगामी हप्ता नोभेम्बर २३ मा नेपाल महोत्सव आयोजना हुने भएको छ । आयोजकले महोत्सवको तयारी अन्तिम चरणमा पुगेको जनाएको छ । हरेक दुई वर्षमा गैरआवासीय नेपालीको संगठन एनआरएनएले आयोजना गर्दै आएको महोत्सव सिड्नीको पर्यटकीय स्थल डार्लिङ्ग हार्बरस्थित टुम्बालोङ्ग पार्कमा हुँदैछ । महोत्सवमा न्यू साउथ वेल्स राज्यका प्रिमियर क्रिस मिन्स प्रमुख अतिथिका रुपमा सहभागी हुने भएका छन् ।
नेपाली कला, संस्कृति, परम्परा तथा पर्यटनलाई प्रोत्साहन गर्ने मुख्य उद्देश्यका साथ हरेक दुई वर्षमा नेपाल महोत्सवको आयोजना हुने गरेको छ । महोत्सवमा प्रिमियरका साथै अस्ट्रेलियाका उच्च राजनीतिक नेता तथा सांसदहरुको समेत सहभागिता रहने आयोजकले जनाएको छ ।
एनआरएनए अस्ट्रेलियाका अध्यक्ष अनिल पोखरेलले महोत्सवको तयारी तीब्ररुपमा भइरहेको जानकारी दिँदै यसवर्षको महोत्सवमा ३० हजार बढीले अवलोकन गर्ने जानकारी दिए । उनका अनुसार महोत्सवमा नेपाली खाना, गरगहना, हस्तकला, पर्यटन लगायतका बिभिन्न स्टलहरु राखिनेछ भने महोत्सवका आगन्तुकका लागि बिभिन्न सांस्कृतिक कार्यक्रमको समेत आयोजना गरिएको छ ।
महोत्सवमा सहभागीलाई नेपाल चिनाउने उद्देश्यका साथ नेपाल हाउसको स्थापना गरिनेछ । जसमा धरहरा, ढुङ्गेधारा, पशुपतिनाथ, बौद्ध स्तुपा लगायतका प्रतिमाको स्थापना हुनेछ । महोत्सवको सुरुवातमा नेपाली पोशाक तथा बाजागाजासहित सिड्नी शहरको मुख्य क्षेत्रमा सांस्कृतिक परेडको आयोजना हुनेछ ।
