अमेरिकाका अधिकांश कम्पनीहरूले ट्यारिफलाई समायोजन गर्न मूल्य बढाउनुपर्ने निश्कर्षमा पुगेको एक नयाँ अध्ययन प्रतिवेदनले देखाएको छ । बीमा कम्पनी एलिएन्जद्वारा सर्वेक्षण गरिएको अमेरिकी कम्पनीहरूमध्ये ५४% ले ट्यारिफको लागत समायोजन गर्न मूल्य बढाउनुपर्ने बताएका छन् । अमेरिका, बेलायत, चीनलगायत नौ देशका ४ हजार ५०० कम्पनीहरूलाई समेटिएको सो सर्वेक्षणमा जम्मा २२% कम्पनीहरूले मात्र लागत वृद्धिलाई आफैंले व्यहोर्न सक्ने बताएका छन् ।
अमेरिकी व्यापार नीतिको अनिश्चितताले पनि निर्यातकर्ताहरूको आत्मविश्वासमा चोट पुगेको बताइएको छ । सर्वेक्षणले देखाएको छ कि हाल ४२% निर्यात गर्ने कम्पनीहरूले आगामी १२ महिनामा आफ्नो कारोबार –२% देखि –१०% ले घट्ने अपेक्षा गरेका छन्, जुन २ अप्रिलमा जब ट्रम्पले आफ्नो ट्यारिफ नीति सार्वजनिक गरे भन्दा पहिले ५% भन्दा कम थियो । यद्यपि राष्ट्रपति ट्रम्पले सुरुमा प्रस्ताव गरेका धेरै ट्यारिफहरू पछि हटाएका छन्, केही प्रमुख ट्यारिफहरू अझै कायम छन् । जसमा सबै अमेरिकी आयातमा १०% को ट्यारिफ, चिनियाँ आयातमा ३०% को ट्यारिफ, र फलाम तथा अटो पाट्र्सजस्ता विशेष उद्योगहरूमा थप शुल्कहरू समावेश छन् ।
ट्रम्पले ट्यारिफले अमेरिका “फेरि धेरै धनी” बनाउने दाबी गर्दै आएका छन् । तर व्यापक मुल्य बेद्धि को उपभोक्ताहरुले सामना गरिरहेका छन । मिशिगन विश्वविद्यालयको सामाजिक अनुसन्धान संस्थानका अनुसार, अप्रिलमा उपभोक्ताहरूको मुद्रास्फीतिको अपेक्षा सन् १९८१ यताकै उच्च विन्दुमा पुगेको बताएको छ । सीधै मूल्य वृद्धि गर्दा ग्राहकहरू टाढा जान सक्छन् भन्ने डरले, धेरै कम्पनीहरूले तुरुन्तै मूल्य नबढाई केही समय ट्यारिफको असरबाट जोगिन स्टक जम्मा गर्न थालेको द गार्जियन समाचारले जनाएको छ ।
१० मध्ये झण्डै ८ अमेरिकी कम्पनीहरूले ट्रम्पले ट्यारिफ घोषणा गर्नु अघि नै चीनमा पठाउने सामानहरू अग्रिम रूपमा ढुवानी गरेको बताएका छन् । तिनीहरूमध्ये २५% ले भनेका छन् कि उनीहरूले यो प्रक्रिया २०२४ को नोभेम्बर चुनावभन्दा अगाडि नै सुरु गरिसकेका थिए ।
अप्रिल महिनाको मुद्रास्फीति तथ्यांकले मूल्य वृद्धिमा उल्लेखनीय परिवर्तन नदेखाए पनि, अर्थशास्त्रीहरू भन्छन् कि ट्यारिफ–सम्बन्धी मूल्यवृद्धिको असर देखिन केही समय लाग्छ । कम्पनीहरूले पनि अब यो लागत केही हदसम्म उपभोक्तामाथि सारिने बताएका छन् ।
रिपोर्टमा संलग्न अधिकांश कम्पनीहरू (६०%) ले ट्यारिफले उनीहरूको व्यापारमा नकारात्मक असर पार्ने अपेक्षा गरेको जनाएका छन् । यस वर्ष सकारात्मक निर्यात वृद्धिको अपेक्षा गर्ने कम्पनीहरूको संख्या ५०% भन्दा कममा झरेको छ, जबकि वर्षको सुरुमा ८०% कम्पनीहरूले त्यस्तो अपेक्षा गरेका थिए ।
