इरानले सोमबार कतारस्थित मध्यपूर्वको सबैभन्दा ठूलो अमेरिकी सैन्य अड्डा अल उदेदमा सैन्य आक्रमण गरेको छ। अमेरिकाले इरानका तीन महत्वपूर्ण आणविक स्थलहरूमा हवाई हमला गरेपछि त्यसको प्रतिशोधमा इरानले यो हमला गरेको हो।
कतारले आफ्नो हवाई रक्षा प्रणालीले मिसाइलहरूलाई सफलतापूर्वक रोकेको जनाएको छ भने इरानी आक्रमणको निन्दा पनि गरेको छ। अमेरिकी रक्षा मन्त्रालयले अल उदेद अड्डामा कुनै अमेरिकी हताहत नभएको पुष्टि गरेको छ
कतारले इरानको हमलालाई आफ्नो ‘सार्वभौमिकता उल्लंघन’ भनेको छ। आवश्यक परे यसको जबाफ दिने अधिकार आफूसँग सुरक्षित रहेको उसले जनाएको छ।
इरानको मिसाइल आक्रमणपछि कतारले अस्थायी रूपमा हवाई क्षेत्र बन्द गर्नुका साथै आफ्नो भूमिमा रहेका अमेरिकी तथा बेलायती नागरिकलाई सुरक्षित स्थानमा बस्न सल्लाह दिएको छ।
यसबीच अमेरिकी राष्ट्रपति डोनाल्ड ट्रम्प केही बेरमा राष्ट्रिय सुरक्षा परिषदको बैठकमा सहभागी हुँदै छन्।
अमेरिकाद्वारा सञ्चालित अल उदैद सैन्य अड्डा कतारको राजधानी दोहाबाट नजिकै छ। यसले मध्यपूर्वमा अमेरिकी केन्द्रीय कमान्डको हवाई मुख्यालयका रूपमा काम गर्छ। यहाँ करिब ८ हजार अमेरिकी सैनिक तैनाथ रहेको बिबिसीले जनाएको छ।
बेलायती फौजहरू पनि बेला बेला तैनाथ हुन्छन्। यसलाई अबु नख्ला विमानस्थल पनि भनिन्छ। यहाँ खाडी क्षेत्रकै सबभन्दा लामो धावनमार्ग छ।
कतारले सन् २००० मा अमेरिकालाई अल उदैद सैन्य अड्डा प्रयोग गर्न अनुमति दिएको थियो। सन् २००१ बाट अमेरिकाले त्यहाँको व्यवस्थापन लिएपछि २००२ डिसेम्बरमा दोहा र वासिङ्टनबीच एक सम्झौतामा हस्ताक्षर भयो। उक्त सम्झौताले नै अल उदैदमा अमेरिकी सैन्य उपस्थितिलाई औपचारिक मान्यता दिएको थियो।
सन् २०२४ मा सिएनएनले गरेको रिपोर्टअनुसार अमेरिका र कतारबीच अर्को १० वर्षका लागि अमेरिकी सैन्य उपस्थिति विस्तार गर्ने सहमति भएको छ।
