मुलुकमा बेरोजगारीको अवस्था कस्तो छ भन्ने कुरा रोजगार अनुमति प्रणाली इपिएस अन्तर्गत दक्षिण कोरिया जानका लागि आवेदन खुला भएको पहिलो दिनमै १८ हजार ८८८ जनाले आवेदन दिएको तथ्यांकबाटै प्रष्ट हुन्छ । यो संख्या सोमबार साँझ ५ बजेसम्म दर्ता भएको सख्या हो ।
इपिएस शाखाले नेपाली युवाहरूका लागि सन् २०२५ को इपिएस परीक्षा आवेदन साउन २६ गतेदेखि ३१ गतेसम्म खुला गरेपछि कोरिया जान अघिल्लो दिन बेलुकाबाटै मानिसहरु लाईनमा बसेर फर्म भरेका थिए । आवेदनको पहिलो चरणमा भाषा परीक्षा हुनेछ, जसमा अनुमानित ५ हजार ३०० जनाले मात्र उत्तीर्ण हुने अपेक्षा गरिएको छ।
शाखाका अनुसार, उत्तीर्ण हुने मध्ये उत्पादनमूलक क्षेत्रमा ३ हजार ५ सय र कृषि तथा पशुपालन क्षेत्रमा १ हजार ८ सय जनाको कोटा रहनेछ।
कोरियामा कामदारको मागअनुसार यो संख्या घटबढ हुन सक्ने बताइएको छ। एक जना व्यक्तिले एउटै क्षेत्रका लागि मात्र आवेदन दिन पाउने नियम लागू गरिएको छ। यो तथ्याङ्कले दक्षिण कोरियामा रोजगारीको अवसरप्रति नेपाली युवाहरूको उच्च आकर्षण झल्काएको छ।
