राष्ट्रपति डोनाल्ड ट्रम्पको व्यापक सामूहिक डिपोटेसन प्रयासहरूबीच, केही कागजातविहिन आप्रवासीहरूलाई कानुनी मान्यता प्रदान गर्ने विधेयक अमेरिकी तल्लो सदन हाउसमा दुई पार्टी(डमोक्र्याट र रिपव्लिकन) का सांसदहरू मिलेर ल्याएका छन । फ्लोरिडाकी रिपब्लिकन सांसद मारिया एल्भिरा सालाजार र टेक्सासकी डेमोक्र्याट सांसद भेरोनिका एस्कोबारद्वारा प्रस्तुत डिग्नीटि एक्ट २०२५ अन्तर्गत, जो आप्रवासीहरू सन् २०२१ भन्दा पहिला अमेरिकामा बसेका छन्, उनीहरूले सात वर्षसम्म कानुनी दर्जाका लागि आवेदन दिन सक्नेछन् । यस दर्जामा काम गर्न पाउने अनुमति हुनेछ, तर संघीय सुविधाहरू वा नागरिकता प्राप्तिको बाटो भने हुने छैन । उनीहरूले क्षतिपूर्ति तिर्नु पर्नेछ र गृह सुरक्षा विभागसँग नियमित सम्पर्क राख्नुपर्नेछ । यसको मतलव २०२१ पछि अमेरिका आएकाहरुको हकमा केहि उल्लेख छैन । ट्रम्प प्रशासनले पछिल्लो चार बर्षभित्र अमेरिका आएका लागि कानुनी हैसियत नदिने अभिव्यक्ति सार्वजनिक भईरहेको बेला आएको यो प्रस्तावले अघिल्लो प्रशासनका कार्यकालमा अमेरिका प्रबेश गर्नेहरु गैरकानुनी हुने संकेत गर्दछ ।
यो प्रस्ताव मुख्य रूपमा ट्रम्प प्रशासनद्वारा गरिएको आप्रवासन कडाईको जवाफस्वरूप ल्याइएको हो, जसले कृषिकार्य र खाद्य सेवा प्रदायकहरूलाई गम्भीर असर पारेको छ । विधेयकले सीमा सुरक्षा थप कडाइ गर्ने र सम्पूर्ण देशभरका रोजगारदाताहरूलाई (कर्मचारीहरू कानुनी रूपमा देशमा छन् कि छैनन् भनेर जाँच गर्ने सरकारी प्रणाली) प्रयोग गर्न अनिवार्य बनाउने प्रस्ताव पनि राखेको छ ।
संसदका सदस्यहरूले दशकौंदेखि समग्र आप्रवासन समाधानमा काम गरिरहेका छन् । सालाजारले भनेकी छन् कि यो प्रस्तावमा माफी वा नागरिकता प्राप्तिको व्यवस्था नभएकाले यसले दुई पार्टीबीच सहमतिको ढोका खोल्न सक्ने आशा उनी गर्छिन् । “४० वर्षदेखि प्रत्येक राष्ट्रपति र कंग्रेसले आँखा चिम्लिरहेका छन्, जबकि लाखौं आप्रवासीहरू यहाँ अवैधानिक रूपमा बसिरहेका छन् र अमेरिकीे अर्थतन्त्र चलाइरहेका प्रमुख उद्योगहरूमा काम गरिरहेका छन् । यो एक्ट एउटा व्यावहारिक समाधान होः निश्चित कागजातविहिन आप्रवासीहरूले काम गरेर, कर तिरेर र देशमा योगदान दिएर कानुनी मान्यता कमाउन सक्छन् तर नागरिकता प्राप्तिका लागि होइन । कुनै राहत छैन, कुनै छोटो बाटो छैन । केवल जवाफदेहिता र हाम्रो अर्थतन्त्र र भविष्यको लागि स्थायीताको बाटो” भनिएको छ ।
यो योजना सहभागीहरूबाट तिर्नुपर्ने क्षतिपूर्ति र तलब करमार्फत वित्तपोषण गरिनेछ । ट्रम्प प्रशासनले आप्रवासी त्यसमा पनि कृषिमा काम गर्ने श्रमिकहरूलाई केही सुरक्षा प्रदान गर्ने प्रक्रिया सुरु गरिसकेको छ । श्रम विभागले आप्रवासन नीतिमा सुधार ल्याएर कामदारहरूलाई कार्य भिसा वा अस्थायी दर्जाका लागि आवेदन दिन सजिलो बनाउने लक्ष्य लिएको छ । जुनको अन्त्यतिर, ट्रम्पले केही आप्रवासी श्रमिकहरूलाई देशमै राख्ने उपायमा काम भइरहेको बताएका थिए ।
“हामी हाल त्यसमा काम गरिरहेका छौं । हामी एउटा अस्थायी पासको व्यवस्था गर्नेछौं, जसमा उनीहरूले कर तिर्छन्, र किसानले केही नियन्त्रण पाउँछ नत्र त सिधै सबैलाई उठाएर लैजान्छन्,” ट्रम्पले फक्स न्यूजलाई बताएका थिए । “हामी किसानका लागि यस्तो उपाय ल्याउँदैछौं, जहाँ किसान स्वयं जिम्मेवार हुनेछन् । किसानलाई थाहा हुन्छ ऊ हत्यारा त भर्ना गर्दैन ।” ट्रम्प प्रशासनले अपराध वा कुनै गतिविधिमा संलग्न नभएकाहरु अमेरिकामा सुरक्षित रहने बताएका छन । तर ट्रम्पको प्रतिज्ञा भए पनि, आप्रवासन र सीमा सुरक्षा प्रवर्तनले अझै पनि कार्यस्थलहरूलाई लक्षित गरि डर पैदा भएको सन्चार माध्यमहरुले बताएका छन । दक्षिण क्यालिफोर्नियाका दुई कृषिप्रशोधन केन्द्रहरूमा हालै गरिएको छापामा २०० भन्दा बढी व्यक्तिहरू पक्राउ परेका थिए र प्रदर्शनकारीहरूसँग हिंसात्मक झडपहरू भएका थिए ।
यो समग्र विधेयकले आप्रवासन प्रणालीका विभिन्न मुख्य पक्षहरूमा अर्थपूर्ण सुधारहरू ल्याउने उद्देश्य राखेको छ । जसमा मुख्य रुपमा अहिले अमेरिकाभित्र बसोबास गरिरहेका कागजातविहिन आप्रवासीहरूलाई कानुनी मान्यता र सुरक्षा प्रदान गर्ने । यसले शरणार्थी छानबिन प्रक्रिया सुधार गर्छ ताकि आवेदकले पुनरावलोकनको अवसर र कानुनी सल्लाह पाउन सकोस ।
विधेयकले नयाँ क्षेत्रीय प्रशोधन केन्द्रहरू स्थापना गर्छ, जसले आप्रवासीहरूलाई अमेरिका–मेक्सिको सिमानासम्मको खतरनाक यात्रा नगरीकनै शरणका लागि आवेदन दिन सक्ने व्यवस्था मिलाउँछ । यसले सिमाना सुरक्षामा लगानी गर्छ र हाम्रो स्थल प्रवेश बन्दरगाहहरूलाई आधुनिक बनाउँछ । यसले आप्रवासन तथा सीमा प्रवर्तनका लागि जवाफदेहिता अनिवार्य बनाउँछ । यसले डाका अन्तर्गतका युवा आप्रवासीहरूका लागि नागरिकता प्राप्त गर्ने बाटो खोल्दछ ।
