अमेरिकाले पाकिस्तानबाट प्रवाह गर्दै आएको भिसा सेवा मार्च १३ तारिकसम्मका लागि बन्द गरेको छ। कराचीस्थित अमेरिकी महावाणिज्य दूतावासमा भएको गोलीकाण्डमा कम्तीमा १० जनाको मृत्यु भएपछि अमेरिकाले पाकिस्तानमा भिसा अपोइन्टमेन्टहरू पुर्ण रुपमा रद्द गर्ने निर्णय गरेको हो।
पाकिस्तानको वर्तमान सुरक्षा अवस्थालाई मध्यनजर गर्दै इस्लामाबादस्थित अमेरिकी दूतावासले सबै भिसा अपोइन्टमेन्ट रद्द गरिएको दुतावासको ट्वीटर ह्याण्डलमा उल्लेख गरिएको छ । दूतावासका अनुसार यो निर्णय इस्लामाबादस्थित दूतावासका साथै लाहोर र कराचीस्थित महावाणिज्य दूतावासहरूको हकमा पनि लागू हुनेछ। दूतावासले जारी गरेको सूचनामा यो स्थगन शुक्रबार, मार्च १३ सम्म जारी रहने उल्लेख गरिएको छ।
गत आइतबार कराचीस्थित अमेरिकी महावाणिज्य दूतावासमा प्रदर्शनकारीहरूले जबर्जस्ती प्रवेश गर्ने प्रयास गरेपछि सुरक्षाकर्मीले चलाएको गोली लागेर कम्तीमा १० जनाको मृत्यु भएको थियो। इरानका सर्वोच्च नेता आयातोल्लाह अली खामेनी अमेरिका र इजरायलको संयुक्त सैन्य आक्रमणमा मारिएको खबर सार्वजनिक भएपछि त्यहाँ प्रदर्शन चर्किएको थियो।
