‘द वान व्युटीफुल बील’ नाम दिइएको करहरुको नयाँ व्यबस्था संबन्धि विधेयक अमेरिकी संसदको समितिबाट एक झिनो मतले पारित भएको छ । एक हजार पेजभन्दा बढीको यो विधेयक रिपब्लिकनको बहुमत रहेको कंग्रेसबाट निश्चित रुपमा पारित हुनेछ । तर सबैभन्दा नयाँ र नौलो चाँही अमेरिकाबाट रेमिट्यान्सको माध्यमबाट बैंक, मनी ट्रान्सफर मार्फत बाहिर पठाउने डलरमा कर प्रस्ताव गरिएको छ । जसबाट अमेरिकामा अर्वो डलरको बचत हुने भनिएको छ । अमेरिकी नागरिकालागि भने त्यो रकम बापत कर छुट पाउनेछन ।
अमेरिकी प्रतिनिधिसभाका रिपब्लिकनहरूले राष्ट्रपति ट्रम्पका कर नीतिहरूलाई अघि बढाउने, मेडिकेड र फूड स्टाम्प (खाद्य सहायता) मा उल्लेखनीय खर्च कटौती गर्ने, लगायत थुप्रै दलगत प्रस्तावहरू समेटिएको एक ठूलो विधेयक पारित गरेको छ । यस विधेयकलाई अमेरिकामा खासगरी राष्ट्रपति ट्रम्पको कार्यकालका लागि महत्वपुर्ण रुपमा हेरिएको थियो । यस विधेयक पास भएपछि अब सिनेटबाट पनि पास हुनुपर्नेछ । यो सिनेटबाट पनि पास भएमा राष्ट्रपति ट्रम्पका लागि यो निकै ठुलो राजनीतिक जित हुनेछ र उनले आफ्नो चुनावी एजेण्डामा उठाएका उल्लेखनीय विषय समेटिनेछ ।
१००० पृष्ठभन्दा लामो यो विधेयक रिपब्लिकन नेताहरूले गोपका मध्यमार्गी र कडा धारणा राख्ने सांसदहरूलाई सन्तुष्ट पार्न रातभरमै संशोधन गरेका थिए । यसमा ट्रिलियन डलरको प्रस्तावित कर कटौती र आगामी दशकमा १ ट्रिलियन डलरभन्दा बढीको खर्च कटौती योजना समावेश गरिएको छ ।
प्रतिनिधि सभाबाट साप भए पनि सिनेटसँगको टकरावको नयाँ चरण सुरू गरेको छ । केही कट्टरपन्थी कन्भरभेटिभ (रूढिवादी) सांसदहरूले प्रस्तावित ४४ ट्रिलियनले ऋण सीमा बढाउने योजना प्रति असन्तुष्टि जनाएका छन् र उक्त विधेयकलाई साना साना टुक्रामा विभाजित गर्न माग गरिरहेका छन् ।
मेमोरियल डे अघि विधेयक पास गर्ने आफूले तोकेको समयसीमा नजिकिँदै गर्दा, राष्ट्रपति ट्रम्पले मंगलबार क्यापिटल भ्रमण गरी आफ्नै पार्टीलाई पंक्तिबद्ध हुन दवाब दिएका थिए, र योजनाको आलोचना गर्ने सांसदहरूलाई लक्षित गर्दै आक्रोश पोखेका थिए ।
ट्रम्पको भ्रमणपछिका केही दिनमा केही मध्यमार्गी रिपब्लिकनहरूले आफ्नो विरोध नरम पार्न थालेका थिए । पार्टी नेतृत्वले उच्च करको ब्लू स्टेटहरूबाट आएका रिपब्लिकन सांसदहरूसँग सम्झौता गर्दै कटौती सीमा बढाउने प्रस्ताव राखेपछि उनीहरू आफ्ना क्षेत्रका बासिन्दाहरूका लागि थप कर छुट सुनिश्चित गर्न सहमत भएका थिए । रिपब्लिकन पार्टीका सबै धारका सांसदहरूले यो विधेयक पारित गराउन ट्रम्पले निर्णायक भूमिका खेलेको स्वीकार गरेका छन् । मंगलबार क्यापिटलमा पुगेका ट्रम्पले आफ्नो पार्टीलाई विधेयकको पक्षमा उभिन दबाब दिएका थिए ।
विधेयकको केन्द्रीय अंश ट्रम्पको २०१७ को कर कटौतीलाई विस्तार गरिएको छ साथै टिप्स र ओभरटाइममा लाग्ने करहरू हटाउने प्रस्तावहरूको लागतले आगामी दशकमा अमेरिकी बजेट घाटामा ट्रिलियनौं डलर थप्ने अनुमान गरिएको छ । विधेयकमा सामाजिक सुरक्षा जाल कार्यक्रमहरूमा व्यापक कटौती पनि समावेश गरिएको छ जसमा यी कटौतीबाट झन्डै १ ट्रिलियन जति बचत हुने अनुमान गरिएको छ । संघीय बजेट विश्लेषकहरूको अनुमान अनुसार, संशोधनहरू नसमेटिएको अवस्थामा पनि यो विधेयकले २ ट्रिलियनभन्दा बढी घाटा बढाउनेछ । व्हाइट हाउसले भने विधेयकले घाटा नबढाउने दाबी गरेको छ ।
