गत सोमबार दिउँसो टेक्सासमा शुक्रबारदेखि आएको बाढीले निम्त्याएको विनाशबाट मृत्यु हुनेको संख्या १०० नाघिसकेको छ र अझै धेरै पीडितहरू फेला पर्न बाँकी रहेको बताईन्छ । थप वर्षाको सम्भावनाले क्षेत्र अझै डुबानमा पर्ने जोखिम रहेकाले यो सख्या अझै बढ्न सक्ने अनुमान गरिएको छ । टेक्सासको ग्वाडालूपे नदीको किनारमा रहेको बालिकाहरूको ग्रीष्मकालीन शिविर, क्याम्प मिस्टिकले २७ जना बालबालिका र परामर्शदाताहरूको मृत्यु भएको पुष्टि गरेको छ । हराइरहेका मानिसहरूको खोजी कार्य जारी रहेको टेक्सास राज्य सरकारले जनाएको छ ।
क्याम्प मिस्टिकमा टेक्सासका केही राजनीतिक उच्च वर्गका सन्तानहरूलाई आतिथ्य दिएको थियो र पूर्वप्रथम महिला लौरा बुस यस शिविरकी काउन्सेलर थिइन् भने पूर्व अमेरिकी राष्ट्रपति लिंडन बी. जोनसन र पूर्व टेक्सास गभर्नर जोन कोनालीका छोरीहरूसमेत शिविरमा सहभागी भएका थिए ।
नजिकका अन्य शिविरहरूबाट हराइरहेका मानिसहरूको संख्या सार्वजनिक गरिएको छैन, किनकि अधिकारीहरूले अझै पनि जीवन खतरामा पर्ने अवस्था कायम रहेको र उद्धारकर्मीहरूले हराइरहेका व्यक्तिहरूको आपतकालीन खोजी कार्य जारी राखिरहेको बताएका छन् । शुक्रबार बिहान सबेरै सान एन्टोनियोको उत्तरतर्फ भारी वर्षा भएपछि ग्वाडालूपे नदी ४५ मिनेटमै २६ फिट (८ मिटर) माथि बढेको थियो ।
