नेपालको निजी क्षेत्रको पहिलो टेलिभिजन ईमेज च्यानल कामना प्रशकासन समुहको प्रमुख दिरेकलाल श्रेष्ठले किनेर व्यवस्थापन हस्तान्तरण भएको छ । विगत २७ वर्षदेखि आरके मानन्धरको अध्यक्षतामा सञ्चालन हुँदै आएको ईमेज च्यानल टेलिभिजन २०८२ साल साउन १ गतेदेखि नयाँ व्यवस्थापन अन्तर्गत सञ्चालन हुने भएको छ । ईमेज च्यानल टेलिभिजनसँगै ईमेज एफएम ९७।९ र ईमेजखबर डट कम पनि नयाँ व्यवस्थापन अन्तर्गत नै सञ्चालन हुनेछन् ।
नयाँ व्यवस्थापनको कार्यकारी अध्यक्षमा परिचित सञ्चार उद्यमी एवं कामना प्रकाशन गृहका प्रमुख कार्यकारी दिरेकलाल श्रेष्ठ रहनुभएको छ भने प्रबन्ध निर्देशकमा अर्का सञ्चार उद्यमी चेङ अग्रवाल रहनुभएको छ । नयाँ व्यवस्थापनले यस ईमेज च्यालन टेलिभिजनमा कार्यरत जगदीश खरेललाई समाचार प्रमुखको जिम्मेवारी समेत प्रदान गरेको छ ।
लाजिम्पाटस्थित ईमेज च्यानलको कार्यालयमा सोमबार आयोजित विशेष समारोहमा ईमेज ग्रुप अफ कम्पनीजका अध्यक्ष आरके मानन्धरले नयाँ व्यवस्थापनलाई जिम्मेवारी हस्तान्तरण गर्नुभयो । समारोहमा अध्यक्ष मानन्धरले युवा सञ्चार उद्यमीहरुको काँधमा जिम्मेवारी विसाउन पाउँदा आफूलाई सन्तोष लागेको बताउनुभयो ।
सो अवसरमा कार्यकारी अध्यक्ष दिरेकलाल श्रेष्ठले ईमेज च्यालन टेलिभिजनको छविको ख्याल गर्दै कम्पनीलाई अघि बढाउने बताउनुभयो । आफूले नेपालको पुरानो प्रकाशन गृह कामना पब्लिकेसनबाट पत्रकारिता सिकेको उल्लेख गर्दै उहाँले आफ्नो डेढ दशकभन्दा बढी समयको छापा माध्यमको अनुभव र ईमेजको तीन दशकको गर्विलो ईतिहासलाई एकाकार गरेर नयाँ उचाईमा पुर्याउने अठोट व्यक्त गर्नुभयो ।
त्यसैगरी नवनियुक्त समाचार प्रमुख जगदीश खरेलले टेलिभिजनका दर्शक नघटेको तर टेलिभिजन हेर्ने माध्यम फेरिएको बताउनुभयो । समाचार तथा समाचारजन्य सामाग्री सशक्त हुनुपर्ने भन्दै उहाँले टेलिभिजनलाई आजको प्रविधिसँग जोड्नुपर्नेमा जोड दिनुभयो ।
व्यवस्थापन परिवर्तनसँगै अब छापा माध्यम पनि हामीसँग जोडिएको छ । २०४१ साल मंसिर १५ गतेदेखि निरन्तर सञ्चालनमा रहँदै आएको नेपालको पहिलो संस्थागत प्रकाशन गृह कामना प्रकाशन गृह अब हाम्रो भगिनी संस्थाको रुपमा जोडिएको छ । टेलिभिजन, रेडियो, अनलाइन र छापा गरी चार वटै माध्यमबाट अझ सशक्त र प्रभावकारी रुपमा प्रस्तुत हुने प्रतिवद्धता पनि नयाँ व्यवस्थापनले जनाएको छ ।
