डलर अवैपतिहरुको स्वर्ग भनेर चिनिएको अमेरिकाको सिलिकन भ्यालीमा आर्थिक असमानतासम्बन्धि एक आश्र्चयजनक रिर्पोट सार्वजनिक भएको छ । सान होसे स्टेट युनिभर्सिटीको नयाँ अनुसन्धान अनुसार, जम्मा नौ घरधुरीले त्यस क्षेत्रको सम्पत्तिको १५% हिस्सा ओगटेको छ । त्यहाँका जम्मा ०.१% बासिन्दाले प्रविधि केन्द्रको ७१% सम्पत्ति ओगटेका छन् ।

यी निष्कर्षहरू २०२५ को “सिलिकन भ्याली पेन इन्डेक्स“ बाट आएका हुन्, जुन सन् २०२० देखि सान होसे स्टेट युनिभर्सिटीको मानव अधिकार संस्थानले प्रत्येक वर्ष प्रकाशन गर्दै आएको छ । यस प्रतिवेदनले सिलिकन भ्यालीमा रहेको “संरचनात्मक असमानता“ को मात्रात्मक मूल्याङ्कन गर्ने उद्देश्य राखेको छ, र “यो अवस्था“ लाई व्यक्तिगत तथा सामुदायिक पीडा वा कष्टका रूपमा मापन गरिएको छ ।

यस वर्षको सूचकांकले देखाएको छ कि विगत एक दशकमा सिलिकन भ्यालीमा सम्पत्तिको खाडल संयुक्त राज्य अमेरिका भरको तुलनामा दोब्बरका दरले बढेको छ । सिलिकन भ्यालीका नौ सबैभन्दा धनी घरधुरीहरूले कुल ६८३.२ अर्ब डलर नियन्त्रणमा छ । जुन गत वर्षको तुलनामा १३६ अर्ब डलरले बढी हन आउँछ ।
त्यसै समयमा, १ लाख १०,००० घरधुरीहरूले आफूसँग झण्डै कुनै सम्पत्ति नभएको वा एकदमै न्यून सम्पत्ति भएको रिपोर्ट गरेका छन् । सिलिकन भ्यालीमा जीवनयापनको लागत पनि उल्लेखनीय रूपमा बढ्दै गएको छ । त्यहाँ भाडामा बस्नको लागि वार्षिक कमाइ कम्तीमा १ लाख ३६ हजार ५३२ हुनुपर्छ जुन अमेरिकाभरि सबैभन्दा उच्च हो ।
उक्त प्रतिवेदनले सान होसेलाई “ महँगो“ शहरहरूको विश्व सूचीमा चौथो स्थानमा राखेको छ (हङकङ, सिड्नी र भ्यानकुभरपछि) । तर, विगत तीन वर्षमा सिलिकन भ्यालीका कुनै पनि शहरले न्यूनतम ज्याला नबढाएको प्रतिवेदनले देखाउँछ । प्रतिवेदन अनुसार सान होसेमा ५४ हजार ५८२ न्यून–आय भएका घरधुरीहरूलाई पहुँचयोग्य आवास उपलब्ध छैन, र बेघरवार २०२३ देखि ८.२% ले बढेको छ ।

सन् २०२० मा, अमेरिका भरि भएको एक आन्दोलनको केही समयपछि, सान होसे स्टेट युनिभर्सिटीका अनुसन्धानकर्ताहरूले सिलिकन भ्याली पेन इन्डेक्स तयार गरेको हो । यो सूचकांकले अझै पनि गहिरो जातीय असमानताहरू देखाइरहेको छ ।

सान होसे, सनीभेल र सान्ता क्लाराका हिस्पानिक कामदारहरूले हरेक १ कमाउने गोरा सहकर्मीको तुलनामा औसतमा ३३ सेन्ट मात्र कमाउने अपेक्षा गर्न सक्छन् । यद्यपि सेयरधनीहरूले विविधता, समानता र समावेशीताको पक्षमा प्रतिबद्धता व्यक्त गरेका छन्, अनुसन्धान तथा विकास क्षेत्रमा कार्यरत कर्मचारीहरूमध्ये मात्र ३% अफ्रिकी–अमेरिकी (ब्ल्याक) छन् (तुलनात्मक रूपमा ६% हिस्पानिक÷लाटिनो, ३६% गोरा, र ५०% एशियन छन ) ।

यसैबीच, प्रहरीद्वारा गरिने हिंसा अझै पनि गम्भीर चिन्ताको विषय बनेको छ । २०२४ मा सान्ता क्लारा काउन्टी शेरिफको हिरासतमा १० जनाको मृत्यु भयो । जुन दुई दशकयताकै सबैभन्दा उच्च संख्या हो । सान होसेले प्रहरी संलग्न पाँच गोलीकाण्ड रिपोर्ट गरेको छ, जुन २०२३ को तुलनामा तीनले बढी हो ।
तर, प्रतिवेदनले सिलिकन भ्याली क्षेत्रका केही सुधारहरू पनि देखाएको छ – जस्तै सान होसेमा प्रहरीले बल प्रयोग गर्ने घटनाहरूमा कमी, बेघरपन रोकथामका सेवाहरूको विस्तार, र वातावरणीय दिगोपनाका कार्यक्रमहरू रहेका छन ।