अर्जेन्टिनाका फुटबल स्टार लियोनेल मेस्सीको बहु प्रतीक्षित भारत भ्रमणको पहिलो दिन कोलकाताको साल्ट लेक रंगशालामा ठुलो हंगामा भएको छ।
मेस्सीले करिब २० मिनेट मात्र बिताएपछि निराश फ्यानले कुर्सी निकालेर फ्याँके, बोतल प्रहार गर्नुका साथै मैदानमा प्रवेश गरेर तोडफोड गरेका थिए। भिभिआइपीहरूले घेरिएका मेस्सीलाई धेरैले राम्रोसँग देख्नै पाएनन्। विश्व फुटबलका महान् खेलाडी लियोनेल मेसीको ‘जीओएटी इन्डिया टुर २०२५’ को पहिलो चरण कोलकातामा भयानक अव्यवस्थाबाट प्रभावित भएको छ। विवेकानन्द युवा भारती क्रीडाङ्गन (साल्ट लेक स्टेडियम) मा भएको कार्यक्रममा मेसी छोटो समय मात्र उपस्थित भएपछि हजारौं फ्यानहरूले कुर्सी उखेलेर फाल्ने, बोतल फ्याँक्ने, ब्यानर च्यात्ने र मैदानमा प्रवेश गर्ने जस्ता कार्य गरेका थिए। यो घटनाले भारतको छविमा ठूलो आघात पुगेको छ।
मेसी डिसेम्बर १३ मा कोलकातामा पुगेका थिए। उनले आफ्नो ७० फिटको प्रतिमा अनावरण गरेका थिए। स्टेडियममा भएको मुख्य कार्यक्रममा उनी करिब २० मिनेट मात्र बसे। फ्यानहरूका अनुसार, राजनीतिज्ञ, VIP र सेलिब्रिटीहरूले मेसीलाई घेरेर राखेका कारण सामान्य दर्शकले उनलाई राम्रोसँग देख्न पाएनन्। टिकट मूल्य ४ हजारदेखि २५ हजार रुपैयाँसम्म थियो, केही VIP टिकट १० लाखसम्म पुगेको रिपोर्ट छ। लामो समय लाइनमा बसेर आएका फ्यानहरूले मेसीलाई झल्को मात्र पाएपछि आक्रोशित बने।
घटनापछि पश्चिम बंगालकी मुख्यमन्त्री ममता बनर्जीले मेसी र फ्यानहरूसँग माफी मागेकी छिन्। उनले सामाजिक सञ्जालमा लेखेकी छिन्, “साल्ट लेक स्टेडियममा भएको कुप्रबन्धनबाट म स्तब्ध र व्यथित छु। लियोनेल मेसी तथा सबै खेलप्रेमी र फ्यानहरूसँग यो दुःखद घटनाका लागि हार्दिक माफी माग्छु।” उनले सेवानिवृत्त न्यायाधीश अशिम कुमार रायको नेतृत्वमा छानबिन समिति गठन गरेकी छिन्, जसले जिम्मेवारी निर्धारण गरी भविष्यमा यस्ता घटना नदोहोरिने उपाय सुझाउनेछ।
प्रहरीले मुख्य आयोजक सतद्रु दत्तलाई पक्राउ गरेको छ। पश्चिम बंगाल प्रहरीका डिजी राजीव कुमारले आयोजकले टिकट रिफन्ड गर्ने लिखित प्रतिबद्धता दिएको बताएका छन्। उनले भने, “कुप्रबन्धनलाई दण्डित गर्न कडा कारबाही हुन्छ।” स्टेडियम बाहिर पनि भीडले प्रदर्शन गरेको थियो, प्रहरीले हल्का बल प्रयोग गरेर नियन्त्रणमा लिएको थियो।
यो घटनाले भारतमा ठूला कार्यक्रम आयोजनाको क्षमता र सिभिक सेन्समाथि गम्भीर प्रश्न उठाएको छ। फ्यानहरूले यो कार्यक्रमलाई “राजनीतिज्ञहरूको फोटो सेशन” भनेका छन्। मेसीको भ्रमण हैदराबाद, मुम्बई र दिल्लीमा जारी रहनेछ, जहाँ प्रदर्शन मैच, युवा क्लिनिक र च्यारिटी कार्यक्रम छन्। कोलकाता घटनाले बाँकी कार्यक्रममा थप सुरक्षा व्यवस्था गरिने अपेक्षा गरिएको छ।
