अमेरिकाको भर्जिनियास्थित फेयरफ्याक्स काउन्टीमा एक नेपाली परिवारभित्र हत्याकाण्ड भएको समाचार छ। छत्रबहादुर थापाले आफ्नै परिवारका सदस्यहरूमाथि धारिलो हतियारले अन्धाधुन्ध प्रहार गरी श्रीमती र छोरीको हत्या गरेको स्थानीय समाचारहरुले जनाएका छन । पायरफक्सस्थित अपार्टमेन्टमा घरेलु हिंसा भइरहेको सूचना पाएपछि प्रहरी घटनास्थल पुगेको बताइएको छ । मृतकहरुको उदयपुर बेलका नगरपालिकाका नेपाल ठेगाना भएको बताइएको छ ।
घटनाको समयमा छत्रबहादुरका ज्वाइँ ३५ वर्षीय सन्तोष कुमार बस्नेत घरबाहिर कारबाट हिउँ पन्छाउँदै थिए। भित्र झगडा भएको आवाज सुनेर ९११ मा फोन गर्दै उनी घरभित्र पस्दा आफ्नी श्रीमती ३१ वर्षीया ममता थापा र ५१ वर्षीया सासू बिन्दा थापालाई रक्ताम्मे अवस्थामा फेला पारेको समाचारमा उल्लेख छ । उनीहरुको हत्यापछि छत्रबहादुरले सन्तोषमाथि पनि सोही हतियारले आक्रमण सुरु गरेका बताइएको छ ।
प्रहरी अधिकारीहरू घटनास्थल पुग्दा छत्रबहादुरले सन्तोषमाथि प्रहार गरिरहेको अवस्थामा फेला पारेका थिए। प्रहरीले पटक पटक हतियार फाल्न दिए पनि आदेश नमानेपछि प्रहरीले गोली चलाउँदा आक्रमणकारी छत्रबहादुरको घटनास्थलमै मृत्यु भएको बताइएको छ । यस भीषण आक्रमणमा परी बिन्दा थापा र ममता थापाको मृत्यु भएको छ भने गम्भीर घाइते सन्तोष कुमार बस्नेतको अवस्था अत्यन्तै नाजुक रहेको समाचारमा उल्लेख छ।
घटनामा ज्वाइँ गम्भीर घाइते भएका छन् र अस्पतालमा उपचाररत छन्। घरमा रहेका एक वर्षका बालक भने सकुशल फेला परेका छन्। आक्रमणमा प्रयोग गरिएको छुरा घटनास्थलबाट बरामद गरिएको प्रहरीले जनाएको छ। यस घटनाले भर्जिनियामा बसोबास गर्ने नेपाली समुदायलाई स्तब्ध बनाएको छ।
