दक्षिण तथा मध्य एसियाली मामिला हेर्ने अमेरिकी सहायक विदेशमन्त्री समीर पल कपुर सोमबार नेपाल पुग्ने कार्यक्रम तय भएको छ । वासिङ्टन डीसीस्थित नेपाली दूतावासका एक कूटनीतिज्ञ र परराष्ट्र मन्त्रालयका एक अधिकारीले कपुर तीनदिने भ्रमणका लागि काठमाडौं आउन लागेको पुष्टि गरेका हुन । समाचार सेतका अनुसार नेपाल सरकारको तर्फबाट पनि अमेरिकी बरिष्ठ कुटनीतिक अधिकारीको आगमनको लागि विशेष तयारी गरिरहेको बताइएको छ । १३ चैतमा प्रधानमन्त्रि बालेन्द्र शाहले कार्यभार सम्हालेयता काठमाडौं भ्रमण गर्ने कपुर सबैभन्दा उच्च तहका विदेशी कूटनीतिज्ञ हुनेछन् । भ्रमणबाट सहायक विदेशमन्त्रि कपुरले नेपाल भ्रमणका क्रममा नयाँ सरकारका प्राथमिकताहरू सुन्नेछन् ।
सहायक विदेशमन्त्री कपुरसँगै अमेरिकी विदेश मन्त्रालयका अन्य दुई अधिकारी पनि काठमाडौं आउन लागेका छन् । काठमाडौं बसाइका क्रममा कपुरले राजनीतिक नेतृत्वसँग भेटघाट गर्ने–नगर्नेबारेमा केही बताइएको छैन । एक सरकारी अधिकारीका अनुसार भ्रमणका क्रममा सहायक विदेशमन्त्री कपुरले अर्थमन्त्री स्वर्णिम वाग्ले, परराष्ट्रमन्त्री शिशिर खनाल र नेपाल–अमेरिका उद्योग वाणिज्य संघका पदाधिकारी तथा सदस्य लगायतलाई भेट्ने कार्यक्रम छ ।
अमेरिकी राष्ट्रपति डोनाल्ड ट्रम्पले दक्षिण एसियाली सुरक्षा मामिला विज्ञ कपुरलाई गत वर्ष अक्टोबरमा डोनाल्ड लुको ठाउँमा दक्षिण एसियाली मामिला हेर्ने सहायक विदेशमन्त्रीमा नियुक्ति गरेका थिए । गत फेब्रुअरीमा बंग्लादेशमा नयाँ सरकार बनेलगत्तै कपुरले त्यहाँको भ्रमण गरेका थिए । त्यसक्रममा उनले सरकारका विदेशमन्त्री खलिलुर रहमान र राज्यमन्त्री शमा ओबेद इस्लामलगायतका उच्च अधिकारीहरूलाई भेटेका थिए ।
परराष्ट्र मन्त्रालयका अनुसार कपुर यसअघि नै काठमाडौं आउने पक्षमा रहे पनि २१ फागुनको संसदीय निर्वाचन र नेपालको आन्तरिक कारण देखाउँदै भ्रमण स्थगन गरिएको थियो । ‘सरकारी अधिकारीहरूसँग भेटमा काठमाडौंस्थित अमेरिकी कूटनीतिज्ञहरूले मिलेनियम च्यालेन्ज कर्पोरेसन एमसीसीको नेपाल कम्प्याक्टको द्रुत र सहज कार्यान्वयन, नेपालमा झन्झटमुक्त लगानी र सूचना प्रविधि कम्पनी कोटिभिटी र कोकाकोलाको कर विवादका समाधान, द्विपक्षीय व्यापारबारे चासो राख्ने गरेका छन् । सहायक विदेशमन्त्री कपुर टर्किस एयरलाइन्सबाट वासिङ्टनबाट सिधैं काठमाडौं आउँदै छन् र, बुधबार त्यही एयरलाइन्सबाट फर्कने कार्यक्रम छ ।
