अन्तर्राष्ट्रिय मुद्रा कोषले हालै जारी गरेको अनुमानअनुसार भारतीय अर्थतन्त्रको आकार बेलायतभन्दा तल झरेर छैटौँ स्थानमा पुगेको छ । आइएमएफले अप्रिलमा सार्वजनिक गरेको ‘विश्वव्यापी आर्थिक परिदृश्य’अनुसार भारतको कुल गार्हस्थ्य उत्पादन (जिडिपी) सन् २०२६–२७ को अन्त्यमा ४.१५ ट्रिलियन डलर हुने प्रक्षेपण छ ।
जबकि, भारतभन्दा अगाडि रहेको बेलायतको जिडिपी ४.२६ ट्रिलियन डलर हुने प्रक्षेपण छ । भारतको वरीयतामा भएको गिरावट सम्भवतः आइएमएफले अर्थतन्त्रको मूल्यांकनका लागि आधार वर्षमा गरेको संशोधनले निम्त्याएको हुन सक्छ ।
त्यसमाथि भारतीय मुद्राको निरन्तर अवमूल्यनले पनि भारतको वरीयता गिरावटमा भूमिका खेलेको हो । पछिल्लो तथ्यांकअनुसार शीर्ष चार स्थानमा रहेका देशको जिडिपी क्रमशः पहिलो अमेरिकाको ३२.२ ट्रिलियन अमेरिकी डलर, दोस्रो चीनको २०.८५ ट्रिलियन डलर, तेस्रो जर्मनीको ५.४५ ट्रिलियन डलर र चौथौ जापानको जिपिडी ४.३८ ट्रिलियन डलर छ ।
