अमेरिकाको सफोल्क काउन्टीले महाप्रबन्धक बस्नेतलाई गर्यो सम्मान न्युयोर्क (अमेरिका)-पत्रकारिता र सञ्चार क्षेत्रको माध्यमबाट नेपाली समुदायमा विशिष्ट योगदान पुर्याएको भन्दै अमेरिकाको सफोल्क काउन्टीका लेजिस्लेटर स्यामुएल गोन्जालेजले अन्नपूर्ण मिडिया नेटवर्कका महाप्रबन्धक मनोज बस्नेतलाई विशेष सम्मान (Proclamation) प्रदान गरेका छन् । न्यूयोर्कमा आयोजित एक विशेष समारोहका बीच नवौँ लेजिस्लेटिभ डिस्ट्रिक्टका तर्फबाट लेजिस्लेटर गोन्जालेजले बस्नेतलाई यो सम्मान प्रदान गरेका हुन् । बस्नेतले लामो समयदेखि मिडिया उद्योग मार्फत नेपाली र हिन्दू डायस्पोरामा पत्रकारिताको सीप र दक्षता विस्तार गर्न महत्वपूर्ण भूमिका खेलेको सम्मान पत्रमा उल्लेख गरिएको छ ।

सम्मान प्रदान गर्दै लेजिस्लेटर गोन्जालेजले भने, “बस्नेतले पत्रकारितामा सत्य र तथ्यको महत्वलाई स्थापित गर्दै पछाडि पारिएका नेपाली आवाजहरूलाई मूलधारमा ल्याउन र उनीहरूको कथालाई विश्वसामु पुर्याउन उत्प्रेरकको भूमिका निर्वाह गर्नुभएको छ । उहाँको कार्यले नयाँ पुस्तालाई पत्रकारिता र सञ्चार क्षेत्रमा लाग्न ठूलो प्रेरणा दिएको छ ।” बस्नेत हाल नेपालको प्रतिष्ठित र ठूलो मिडिया हाउस ‘अन्नपूर्ण मिडिया नेटवर्क’ (AMN) मा सन् २०२४ जुलाईदेखि महाप्रबन्धकका रूपमा कार्यरत छन् । उनले अन्नपूर्ण पोस्ट (नेपाली राष्ट्रिय दैनिक), दि अन्नपूर्ण एक्सप्रेस (अंग्रेजी दैनिक), अन्नपूर्णपोस्ट डटकम, रेडियो अन्नपूर्ण र एपी वान (AP1) टेलिभिजनको व्यवस्थापकीय नेतृत्व गरिरहेका छन् । विगत १८ वर्षभन्दा लामो समयदेखि सञ्चार क्षेत्रमा सक्रिय बस्नेतसँग समाचार संकलन, बिक्री, वितरण, बजार व्यवस्थापन र कर्पोरेट रणनीतिका विभिन्न क्षेत्रमा काम गरेको अनुभव छ । सफोल्क काउन्टीले उनको यो समर्पण र योगदानलाई कदर गर्दै उत्कृष्ट सेवा र समाजप्रतिको उत्तरदायित्वका लागि बधाई समेत ज्ञापन गरेको छ । नेपाली मिडियाकर्मी बस्नेतलाई गरिएको उक्त्त सम्मानले प्रवासमा रहेका नेपाली र स्थानीय सरकारबीचको सम्बन्धलाई थप प्रगाढ बनाउनुका साथै नेपाली पत्रकारिताको अन्तर्राष्ट्रिय स्तरमा सम्मान बढेको महसुस गरिएको नवराज केसीले बताए ।