आइसिसी टी– २० विश्वकप अन्तर्गत समूह चरणको अन्तिम दुई खेल खेल्न नेपाली टोली बिहीबार सेन्ट भिन्सेन्ट पुगेको छ । यसअघि बुधबार अमेरिकाको फ्लोरिडाबाट सेन्ट भिन्सेन्ट जानका लागि तय भएको नेपाली टोलीको यात्रा खराब मौसमका कारण रोकिएको थियो ।
बुधबार लगातार पानी परेका कारण हवाई उडान रद्द भएकोले नेपाली टोली बिहीबार दिउँसो वेस्ट इन्डिजको सेन्ट भिन्सेन्ट पुगेको हो । समूह ‘डी’ अन्तर्गत नेपाल अमेरिकामा दुई खेल सकेर बाँकी दुई खेल खेल्न सेन्ट भिन्सेन्ट गएको हो ।
नेपाल समूहको पहिलो खेलमा नेदरल्यान्ड्ससँग पराजित भएको थियो । डालासमा भएको पहिलो खेलमा नेपाल नेदरल्यान्डससँग ६ विकेटले पराजित भएको थियो । यस्तै फ्रलोरिडामा बुधवारका लागि तय भएको श्रीलङ्काविरुद्धको दोस्रो खेल भारी वर्षाका कारण रद्द भएको थियो ।
नेपालले सेन्ट भिन्सेन्टमा शनिवार दक्षिण अफ्रिकासँग तेस्रो र साेमबार बङ्गलादेशसँग अन्तिम खेल खेल्नेछ । नेपाललाई समूह चरण पार गरेर सुपर आठमा स्थान बनाउन अबका दुई खेल जित्नै पर्ने बाध्यता छ । अहिले समूहमा लगातार तीन जित निकालेको दक्षिण अफ्रिका ६ अङ्क जोड्दै शीर्षस्थानमा छ । दक्षिण अफ्रिकाले सुपर आठमा स्थान बनाई सकेको छ ।
यस्तै दोस्रो स्थानमा रहेको बङ्गलादेशको चार अङ्क छ । बिहीबार भएको खेलमा बङ्गलादेशले नेलरल्यान्ड्सलाई २५ रनले हराएको थियो । सेन्ट भिन्सेन्टको किङसटाउन मैदानमा भएको खेलमा जितका लागि बङ्गलादेशले दिएको एक सय ६० रनको लक्ष्य पछ्याएको नेदरल्यान्ड्स निर्धारित २० ओभरमा आठ विकेटको क्षतिमा एक सय ३४ रनमा समेटिएको थियो ।
यसअघि पहिले ब्याटिङ गरेको बङ्गलादेशले निर्धारित २० ओभरमा पाँच विकेटको क्षतिमा एक सय ५९ रन बनाएको थियो । हारे पनि तीन खेलबाट दुई अङ्क बनाएको नेदरल्यान्डस तेसो स्थानमा छ । दुई खेलबाट एक अङ्क बनाएको नेपाल चौथो र तीन खेलबाट एक अङ्क बनाएको श्रीलङ्का अन्तिममा छ । श्रीलङ्का विश्वकपबाट बाहिरी सकेको छ ।
सन्दीपसहितको अभ्यास
बिहीबार सेन्ट भिन्सेन्ट पुगेको नेपाली क्रिकेट टोलीले स्पिनर सन्दीप लामिछानेसहित अभ्यास गरेको छ । सन्दीप लामिछाने एक साताअघि नै विश्वकप कप खेल्न वेस्ट इन्डिज पुग्नुभएको हो ।
अमेरिकाले दुई पटकसम्म भिसा दिन अस्वीकार गरेपछि क्यानडा हुँदै वेस्ट इन्डिज पुग्नुभएका सन्दीपले सेन्ट भिन्सेन्टमा दक्षिण अफिका र बङ्गलादेशसँग समूह चरणको खेल खेल्नुहुनेछ । उहाँको आगमनले टोलीको आत्मविश्वास थप बढेको नेपाली टोलीका प्रशिक्षक मोन्टी देसाईले बताउनुभएको छ ।
सन्दीप टोलीका लागि महत्त्वपूर्ण खेलाडी भएको र उनको आगमनले नेपालको लेग स्पिनर आक्रामक बन्ने प्रशिक्षक मोन्टीको भनाई छ । यस अघिनै वेस्ट इन्डिज पुगेर तयारी गर्नुभएका सन्दीपले बिहीबार टोलीसँगै सामूहिक अभ्यास गर्नुभएको हो ।
उच्च अदालत पाटनले बलात्कार मुद्दामा सन्दीपलाई गत महिना सफाइ दिएपछि नेपाल क्रिकेट सङ्घ ९क्यान० ले उहाँमाथिको प्रतिबन्ध फुकुवा गर्दै टी(२० विश्वकप टोलीमा समावेश गरेको थियो । अन्तिममा प्रतिश जिसीलाई बाहिर राख्दै क्यानले सन्दीपलाई अन्तिम १४ खेलाडीको सुचीमा समावेश गरेको हो । यसअघि नेपाललाई विश्वकपमा छनोट गराउन सन्दीपको प्रदर्शन उल्लेख्य रहेको थियो ।
नेपालका कप्तान रोहित पौडेलले पनि सन्दीप टोलीमा जोडिएपछि बलिङ पक्ष थप बलियो बन्ने विश्वास गर्नुभएको छ । ‘ ‘सन्दीपले चार पाँच महिना प्रतिस्पर्धात्मक खेल नखेले पनि तयारी गरिरहेकोले उहाँले टोलीका लागि उत्कृष्ट प्रदर्शन गर्नुहुनेछ । यसअघि क्यारावियन लिग खेलेकोले पनि वेस्ट इन्डिजको पिचको बारेमा उहाँ अभ्यस्त हुनुहुन्छ,’’ पौडेलले भन्नुभयो । उहाँले लगातार दुई खेल जित्दै नेपाललाई सुपर आठमा लग्न सक्दो प्रयास गर्ने प्रतिबद्धता पनि जनाउनुभयो ।
‘ ‘अमेरिकाको र वेस्ट इन्डिजको विकेट अवस्था फरक छ । हामीले अमेरिकाको खेलमा मजा लियौँ । डालासको खेल पनि ठिकै थियो । श्रीलङ्काविरुद्धको खेल रोकियो । नतिजा जस्तो आए पनि नेपाली दर्शकको समर्थन अपार रहेको छ । सेन्ट भिन्सेन्टमा पनि त्यस्तै समर्थनको आशा गरेका छौँ । दक्षिण अफिकाले अहिले एकदमै राम्रो खेलिरहेको छ । सुपर आठमा पुग्न हामीले दुइटै खेल जित्नै पर्छ । हामी खेल दौरानमै विकेटको अवस्था बुझेर दक्षिण अफ्रिकाको चुनौती सामना गर्न तयार छौँ । यहाँको विकेट हेर्दा एक सय ६० रन राम्रो स्कोर हुनसक्छ,’’ बिहीबार आयोजित पत्रकार सम्मेलनमा रोहितले भन्नुभयो ।
यस्तै दक्षिण अफ्रिकाका बलर कागिसा रबाडाले सुपर आठमा पुगे पनि आफूहरूले कुनै पनि टोलीलाई कमजोर नठान्ने बताउनुभयो । ‘ ‘नेपालले पछिल्लो समय धेरै क्रिकेट खेलिरहेको छ । अन्तर्राष्ट्रिय खेलमा सबै टोली बलियो नै हुन्छ । हामी सबै खेल रामो खेल्न चाहन्छौँ । नेपाली टोलीलाई सन्दीपको आगमनले बलियो बनाएको छ । सन्दीप अनुमान गर्न नसकिने उत्कृष्ट स्पिनर हुन् । यस्तो बलरलाई झेल्न जसलाई पनि गाह्राे हुन्छ,’’ बाडाले भन्नुभयो ।
