अमेरिकी सेक्रेट सर्भिसकी निर्देशक किम्बर्ली चेटलले आफुले पूर्वराष्ट्रपति डोनाल्ड ट्रम्पको हत्या प्रयासको सुरक्षा दिन असफल भएको स्वीकार गर्दै राजीनामा लिएकी छिन ।
संसदको निरीक्षण र जवाफदेहितासम्बन्धी समितिको सुनुवाइमा उनले जुलाई १३ मा आफूहरु असफल भएको र अमेरिकाको सेक्रेट सर्भिसको निर्देशकका रूपमा कुनै पनि सुरक्षा त्रुटिका लागि पूर्ण जिम्मेबारी लिने बताएकी थिइन् । उनले आफ्नो असफलता स्वीकार गरेसंगै रिपब्लिकन सांसदहरूबाट राजीनामा गर्न आह्वान गरेपछि उनको राजिनामा आएको हो । आफूले एजेन्सीमा सक्दो राम्रो काम गरेको र पछिल्लो घटनामा आफ्नो कमजोरी स्वकार गर्दै भारी मनले निर्देशकको पद छोड्ने कठिन निर्णय गरेको उनले बताएकी छिन् ।
मंगलबार सेक्रेट सर्भिसका कर्मचारीहरूलाई पठाइएको इमेलमा चेटलले सेक्रेट सर्भिसको प्रमुख कर्तव्यहरूमध्ये एक राष्ट्रका नेताहरूको सुरक्षा गर्नु रहेको र एजेन्सीले बन्दुकधारीबाट अभियान र्याली सुरक्षित गर्न असफल भएकोमा जुलाई १३ मा उक्त मिसनमा चुकेको उल्लेख गरेकी छिन । सेक्रेट सर्भिसका महत्त्वपूर्ण मिशनमा त्यसमा कार्यरतहरु प्रत्येकले गर्ने महान कामबाट विचलित नहोस् भन्ने उद्देश्यले आफूले राजिनामा दिएको उनले कर्मचारीलाई पठाएको इमेलमा बताएकी छिन् । घटनालगत्तै सेक्रेट सर्भिसले गर्नुपर्ने काममा तत्काल गर्न नसकेको नागरिक स्तरमा पनि व्यापक मात्रामा आलोचना भए पनि संसदीय समितिले चटेललाई बयानका लागि बोलाएको थियो । राष्ट्रपति जो बाइडेनले उनलाई अगस्ट २०२२ मा सो प्रमुख पदमा नियुक्ति गरेका थिए । बाइडेनले चाँडै नै नयाँ निर्देशक नियुक्त गर्ने बताएका छन्।
