न्युयोर्क राज्य सांसदमा नेपाली अमेरिकन सांसद सराहना श्रेष्ठ निर्वाचित भएकी छिन् । न्युयोर्क स्टेट एसेम्बलीको डिष्ट्रिक्ट १०३ बाट उमेदवार बनेकी श्रेष्ठ दोश्रो कार्यकालका लागि निर्वाचित भएकी हुन् । छोटो समयमा राजनीतिक सफलता हात पारेकी सराहना न्युयोर्क राज्य संसदमा प्रतिनिधित्व गर्ने पहिलो नेपाली अमेरिकन र अमेरिकाकै राज्य संसदमा पहिलो नेपाली अमेरिकन महिला हुन् । यसअगाढि उनी २०२२ को चुनावमा २ बर्षका लागि निवार्चित भएकी थिइन् ।
उनको पहिलो कार्यकाल सन् २०२५ को जनवरी १ मा सकिदै थियो । मंगलबारको चुनावमा निर्वाचित भएसँगै अब उनको कार्यकाल सन् २०२७ को जनवरी १ सम्म थप भएको छ ।
२०२२ मा ३६ हजार ६ सय ५ मत ल्याएर निर्वाचित भएकी उनले यसपटक ६५ प्रतिशत मतगणना हुँदा ३२ हजार ७ सय ९८ मत ल्याएर विजयी भएकी छिन् । अर्थात् उनले कुल गणना भएको ६४ प्रतिशत मत प्राप्त गरेकी छिन् । सन् २००१ मा अध्ययनका लागि न्युयोर्क आएकी श्रेष्ठले सन् २०१९ मा मात्र अमेरिकन नागरिकता प्राप्त गरेकी थिइन् । यस अघि नै मेरिल्याण्डबाट नेपाली अमेरिकन ह्यारी भण्डारी निर्वाचित राज्य सांसद छन ।
