गैरआवासीय नेपाली संघ एनआरएनएको १७औँ युरोप सम्मेलनको तयारी पूरा भएको आयोजकले जनाएको छ। एनआरएनए आयरल्यान्डले व्यवस्थापन गर्ने डबलिनस्थित रेडिसन ब्लू रोयल होटलमा आयोजना हुने यो सम्मेलनको नाम ‘संकल्प’ दिइएको छ। अनलाइन भर्चुअलमा आयोजित पत्रकार सम्मेलनमा संघका युरोप संयोजक रोबोट लिम्बूले अगस्ट १० र ११ मा हुने सम्मेलनका लागि आवश्यक सम्पूर्ण तयारी पूरा भएको जानकारी दिए।
राष्ट्रिय स्वतन्त्र पार्टी रास्वपा संसदीय दलका उपनेता गणेश पराजुलीको प्रमुख आतिथ्यमा हुने सम्मेलनको मुख्य नारा ‘पहिचानमा एकता, लगानीमा अग्रसरता र सम्वृर्द्धिप्रति प्रतिवद्धता’ तय भएको पत्रकार सम्मेलनमा जानकारी गराइयो। यो सम्मेलनले गैरआवासीय नेपाली नागरिकता र अधिकार, नेपालमा लगानी, महिला ,युवा र दोस्रो पुस्ताको सहभागितालाई प्राथमिकताका दिएको संयोजक लिम्बूले बताए।
संयोजक लिम्बूले सम्मेलनलाई सफल बनाउन आवश्यक व्यवस्थापन, आवास, दर्ता, सुरक्षा तथा अन्य प्राविधिक तयारी पूरा भइसकेको जानकारी दिँदै युरोपभर रहेका नेपाली समुदायलाई सम्मेलनमा सक्रिय सहभागिताका लागि पत्रकार सम्मेलनमार्फत आग्रह गरे। ३५ देशबाट २ सय भन्दा बढी प्रतिनिधि सहभागी हुने सम्मेलनमा १० वटा विभिन्न विषयगत सत्रहरूमा सय भन्दा बढि प्यानालिस्टहरुको सहभागिता हुनेछ। सम्मेलनमा गैरआवासीय नेपालीका हकहित, नेपालमा लगानी प्रवर्द्धन, पर्यटन, युवा तथा महिला सहभागिता, नागरिकतासहित प्रवासी नेपालीसँग सम्बन्धित समसामयिक विषयमा छलफल हुनेछ।
मिडिया संयोजक बाबा राजेश्वरी थापाको सञ्चालनमा भएको पत्रकार सम्मेलनमा संघका केन्द्रीय अध्यक्ष डा हेमराज शर्मा, उपाध्यक्ष रामशरण सिंम्खडालगायतले सम्बोधन गरेका थिए।
