बंगलादेशको अन्तरिम सरकारले पूर्वप्रधानमन्त्री सेख हसिनालाई ढाका फर्काउन भारतलाई कूटनीतिक नोट पठाएको छ । गत अगस्टमा विद्यार्थी नेतृत्वको आन्दोलन चर्किएपछि ७७ वर्षीया हसिना भागेर भारत पुगेकी थिइन् । भारत पलायन भएसँगै उनको १६ वर्ष लामो शासन अन्त्य भएको थियो । अगस्ट ५ देखि उनले भारतमा निर्वासित जीवन बिताइरहेकी छिन् ।
हसिनालाई स्वदेश फर्काउन भारत सरकारलाई ‘नोट भर्बेल’मार्फत अनुरोध गरिएको बंगलादेशको अन्तरिम सरकारका विदेश मामिला सल्लाहकार तौहिद हुसेनले बताए । ‘हामीले सेख हसिनालाई फिर्ता पठाउन अनुरोध गर्दै भारतलाई नोट भर्बेल पठाएका छौँ,’ हुसेनले भने । हप्तौँको विरोध र झडपपछि अगस्ट ५ मा भएको निर्णायक अन्दोलनले हसिनालाई अपदस्थ गरेको थियो । आन्दोलनमा ६ सयभन्दा बढी मानिसको मृत्यु भएको थियो । उनी भारत भागेपछि नोबेल पुरस्कार विजेता मुहम्मद युनुसको नेतृत्वमा अन्तरिम सरकार गठन भएको छ ।
यसअघि डिसेम्बर ९ मा सेख हसिनाले बंगलादेशको अन्तरिम सरकारका प्रमुख सल्लाहकार मुहम्मद युनुसलाई आफ्नो सत्ताबाट बहिर्गमनमा परिणत भएको विद्यार्थी प्रदर्शनको ‘मास्टरमाइन्ड’ भएको आरोप लगाउँदै प्रदर्शन ‘सावधानीपूर्वक डिजाइन’ गरिएको दाबी गरेकी थिइन् ।
युनाइटेड किङडम अबामी लिगको भर्चुअल बैठकलाई सम्बोधन गर्दै हसिनाले प्रदर्शनकारीको सबै माग पूरा भए पनि देशभरि अशान्ति जारी रहेको बताएकी थिइन् ।
‘सन् २०२४ जुलाई ७ मा सुरु भएको विद्यार्थी आन्दोलन विद्यार्थीद्वारा सुरु गरिएको थिएन, तर मलाई सत्ताच्युत गर्न सावधानीपूर्वक डिजाइन गरिएको विरोध प्रदर्शन थियो भनेर युनुसले आफैँ भनेका छन् । उनी मास्टरमाइन्ड थिए,’ हसिनाले दाबी गरिन् ।
उनले देशको अवस्थालाई नियन्त्रण गरेकोमा अन्तरिम सरकारको आलोचना गर्दै यसलाई ‘तानाशाही’ भन्दै बंगलादेशी जनतालाई अधिकारबाट ‘वञ्चित’ गरिएको आरोप लगाएकी थिइन् । ‘आज बंगलादेश कठिन समयबाट गुज्रिरहेको छ । तानाशाही सरकारअन्तर्गत बंगलादेशका जनतालाई उनीहरूको अधिकारबाट वञ्चित गरिएको छ । सम्पूर्ण बंगलादेश जलिरहेको छ. । बंगलादेश नष्ट भइरहेको छ,’ उनले भनेकी थिइन् । अन्तर्राष्ट्रिय समुदायले घटनाक्रमलाई नजिकबाट हेरिरहेको छ । धेरैजना हसिनाको सम्भावित प्रत्यर्पणको प्रभावबारे चिन्तित छन् ।
यसैबिच सरकारले हसिना र उनको परिवारमाथि पाँच अर्ब डलर घोटालाको अनुसन्धान सुरु गरेको छ । रुस समर्थित आणविक ऊर्जा संयन्त्रमा कथित पाँच अर्ब डलरको घोटालाबारे उनी र उनको परिवारमाथि अनुसन्धान सुरु भएको भ्रष्टाचारविरोधी आयोगले सोमबार जनाएको हो ।
हसिनाका साथै उनका छोरा सजीव वाजेद जोय र भतिजी टुलिप सिद्दिक अनुन्धानको दायरामा परेका छन् । सिद्दिक बेलायती सांसद र सरकारीमन्त्री छिन् । हसिनाका राजनीतिक प्रतिद्वन्द्वी नेसनल डेमोक्रेटिक मुभमेन्ट पार्टीका अध्यक्ष बबी हजाजले अनुसन्धान गर्न माग गर्दै उच्च अदालतमा रिट हालेका छन् । ‘हामी हाम्रो अदालतमार्फत न्याय खोज्छौँ,’ हजाजले भने ।
