यिनको परिवर्तित नाम हो धीरा दास । अमेरिकाको वेष्ट भर्जिनियास्थित ‘नयाँ वृन्दावन’ मा आएपछि उनले पाएको नाम हो यो । उनको खास नाम चाहिँ डेनियल हो । उनी मूलतः क्रिष्चियन धर्म मान्ने मान्छे हुन् । तर विगत एक वर्षदेखि उनको नाम धीरा बनेको छ । होण्डुरसबाट अमेरिका छिरेका ३१ वर्षीय धीरा दास अहिले ‘कृष्णका दास’का रुपमा यही वृन्दावनमा भजन, कीर्तन र सत्सँगमा रमेका छन् ।
‘हरेकृष्ण’ आन्दोलनका अगुवा वा संरक्षक हुन् भक्तिवेदान्त स्वामी प्रभुपाद । प्रभुपादले नै इस्कोन (इन्टरनेसनल सोसाइटी फर कृष्ण कन्सियसनेस) मार्फत अमेरिकादेखि युरोपसम्म ‘हरेराम’ को नाम जपदेखि भजन कीर्तनका मार्फत हजारौँ मानिसहरुलाई सनातन धर्मसँग जोड्नुभएको छ । प्रभुपादले स्थापना गरेको यो वृन्दावन चाहिँ भारत इतर पहिलो धाम हो ।
‘मलाई यहीँ मनपर्छ’ मनोविज्ञानका विद्यार्थी धीरादास भन्छन् । उनी कृष्णको भजनामृतले लठ्ठ छन्, मख्ख छन् । दैनिक हुने भजन, कीर्तन मात्र होइन, गाईको स्याहार सुसार र यहाँभित्रको सरसफाइमा उनी लगनशील भएर काम गरिरहेका छन् । ‘म २० वर्षको हुँदा मैले हरे कृष्णको नाम सुनेको हुँ र यसप्रति मेरो लगाव हुँदै गएको हो । कृष्णको भजन र कीर्तनले अनुशासन र समर्पण सिकाउँदो रहेछ । यसले आत्मा र मस्तिष्कलाई पनि परिष्कृत गर्दोरहेछ । कृष्णलाई मैले धेरै बुझेको छैन तर उहाँ एक असल कार्मिक व्यक्ति हुनुहुन्छ । मैले लिएको बाटो र मेरो विचार अध्यात्मतिर ढल्केको छ ।’ उनको भनाइ छ ।
यही वृन्दावनमा भेटिएका अरु दुइ पात्र हुन् प्याट्रिक र जोस । ५० वर्षीय जोस भर्खरै मात्र हरे कृष्ण मुभमेन्टमा समावेश भएका हुन् भने प्याट्रिक १६ वर्षदेखि यो आन्दोलनमा सक्रिय छन् । उनी वृन्दावनभरि ‘कृष्णमाया दास’ का नामले चिनिन्छन् । यी दुवै क्रिष्चियन धर्मका व्यक्ति थिए । तर कालान्तरमा यी दुवै हिन्दु धर्ममा प्रवृत्त भए, कृष्णको मार्गमा हिँड्न चाहे र हरेकृष्णको मूलमन्त्र लिएर हिँडिरहेका छन् । नित्य हुने प्रवचन, भजन, कीर्तन र सन्ध्या आरतिमा उनीहरुको पूरापूर संलग्नता छ । यसवाहेक हरेक दिन आउने हिन्दु र हिन्दु इतरका अतिथिहरुलाई कृष्णको भजन र कीर्तन मार्फत कृष्णभक्तिको रसास्वादन गराइरहेका छन् ।
यहाँ हरेक दिन बिहान र साँझ मेक्सिको, अर्जेन्टिना, ग्वाटेमाला, अमेरिका, युरोपको विभिन्न देशबाट आएका र कृष्णभक्तिमा रमेका करिब एक सय ५० भन्दा बढी भक्तहरु नाचगान र भजन कीर्तनमा सहभागी भएको देख्दा सनातनप्रतिको हाम्रो आस्था अझ उँचो भएको लाग्छ । गर्वको अनुभूति हुन्छ । अलिकति पैसाको लोभमा हाम्रो विशाल र सनातन धर्म छाडेर पर धर्म अँगाल्ने अबुझ र स्वाँठदेखि घृणा पनि जाग्दछ । भवतु सब्व मंगलम् ।
पत्रकार कृष्णराज खनालको फेसबुक पेजबाट लिइएको सामाग्री
