राजावादीहरुले आन्दोलन चर्काउँदै लैजाने तयारी स्वरुप राजसंस्था पुनर्स्थापनाको आन्दोलनका लागि राप्रपाका वरिष्ठ नेता एवं राष्ट्रिय पञ्चायतका पूर्वअध्यक्ष नवराज सुवेदीको नेतृत्वमा मोर्चाबन्दीको तयारी भएको छ । पूर्वराजा ज्ञानेन्द्र शाहको इच्छाअनुसार ८६ वर्षीय उनले राजावादी आन्दोलनको मोर्चा सम्हाल्ने भएका छन । पन्चायतकालदेखि राजाको शासनकालमा ७ पटक मन्त्रि भएका सुवेदीको नेतृत्वमा सबै राजावादीहरु आन्दोलनमा सहभागी तयारी गर्दै चैत्र १५ देखि आन्दोलन चर्काउने तयारी गरिएको समाचार श्रोतले जनायो ।
सुवेदीले राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, राप्रपाका शीर्ष नेताहरू पशुपतिशमशेर राणा, डा। प्रकाशचन्द्र लोहनी, विक्रम पाण्डे, धवलशमशेर राणा, पूर्वमन्त्री केशरबहादुर विष्ट, राजावादी अभियानका दुर्गा प्रसाईंलगायतसँग भेटेर छलफल गरिसकेको बताईन्छ । ०४६ पछि राजनीतिमा सार्वजनिक रूपमा सक्रिय नदेखिएका सुवेदीले पूर्वराजा शाहको इच्छाअनुसार मोर्चाको नेतृत्व गर्न लागेको नेताहरूको भनाइ छ । राप्रपालाई नेतृत्व दिए दर्गा प्रसाईले नमाने र प्रसाईलाई दिए राप्रपा र राप्रपा नेपालले नमान्ने र एकले अर्कालाई अस्तित्व नमानेपछि पुर्वराजाले विकल्पका रुपमा सुवेदीलाई चयन गरेपछि दुवै पक्ष सहजै स्व्ीकार नगरे पनि विरोध गरेका छैनन । राप्रपा र राप्रपा नेपालका नेताहरूले पूर्वराजाको छनोटमा सार्वजनिक रूपमा आलोचना नगरे पनि सुवेदीको नेतृत्वमा आन्दोलन निष्कर्षमा पुग्न नसकिने उनीहरूको आन्तरिक निष्कर्ष छ । यसबारेमा राप्रपाको आइतबार बस्ने केन्द्रीय कार्यसम्पादन समितिको बैठकमा छलफल हुने बताइएको छ ।
राप्रपा नेपालले संस्कृतिविद् डा जगमान गुुरुङको नेतृत्वमा सबै राजावादी अटाउने मोर्चाबन्दी गर्न चाहेको थियो तर केहि विरोध शुरु भएको छ । ‘सुवेदीजीको उमेरका कारण आन्दोलन अघि बढ्न नसक्ने भन्दै केहि विकल्प खोज्न पनि छलफल भइरहेको बताईन्छ । ‘राजेन्द्र लिङ्देन, कमल थापा, पशुपतिशमशेर राणा, प्रकाशचन्द्र लोहनी, धवलशमशेर राणा कसैको नेतृत्वमा कोही तयार नहुने, दुर्गा प्रसाईंदेखि केशरबहादुर विष्टसम्म अटाउने नेतृत्व सुवेदीको मात्रै हुने भएपछि सुवेदी सर्वमान्य भएको एक राजावादी निकटले बताएका छन ।
