नेपालमा पछिल्ला जेन्जी आन्दोलन हिंसात्मक प्रदर्शन देखेपछि त्यहि अस्थिर परिस्थितिलाई कारण देखाउँदै क्यानडाले नेपाली नागरिकहरुको भिसा अस्वीकार गर्ने दर ९० प्रतिशतले बढेको बताइएको छ । अध्ययन र भ्रमणका लागि आवेदन दिएका धेरै नेपालीहरुको भिसा हालै अस्वीकृत भएको पुष्टि भएको छ। क्यानडा इमिग्रेशन, रिफ्युजी एण्ड सिटिजनसिप विभागले पठाएको पत्रमा भनिएको छ, “सेप्टेम्बर २०२५ मा आवेदक नागरिक रहेको देशमा ठूलो हिंसात्मक विरोध प्रदर्शनहरू भए तथा सुरक्षा र वित्तीय स्थितिमा गम्भीर गिरावट आएको छ। यस्तो अवस्थामा आवेदकको क्यानडासँग पर्याप्त सम्बन्ध देखिन्न।”
सामान्यतया बैंकक र सिंगापुरस्थित क्यानडियन भिसा अफिसमार्फत भिसाको निर्णय हुने गरेकोमा, यस पटक नेपालको अस्थिर अवस्थालाई नै मुख्य कारण देखाउँदै भिसा अस्वीकृत गरिएको हो। यस कदमपछि विशेषगरी अध्ययन भिसाका लागि तयारी गरिरहेका धेरै विद्यार्थी चिन्तित भएका छन्।
यस्तै, अन्य केही देशले पनि नेपालको पछिल्लो अवस्थालाई आधार बनाउँदै भिसा अस्वीकार गर्न थालेको जानकारी प्राप्त भएको छ। पछिल्ला दिनहरुमा नेपालको आन्तरिक कारण र कुटनीतिक फितलोपनका कारण दर्जनभन्दा बढी देशहरुले दिंदै आएको ईन अराईभरल भिषा पनि दिन छाडेको छ । यसैगरी केहि दिन अगाडी दुवईले नेपालीलाई पर्यटक भिषा दिन छाडेको थियो ।
