अमेरिकी सरकारले मादक पदार्थ तस्कर गिरोह र तिनका शंकास्पद राजनीतिक सहयोगीहरूविरुद्धको कारबाहीलाई तीव्र पार्दै ५० भन्दा बढी मेक्सिकी अधिकारीहरूको भिसा रद्द गरेको समाचार छ । यो कदमले नियमित रूपमा अमेरिका आवतजावत गर्ने र त्यहाँ जान भिसा आवश्यक पर्ने मेक्सिकोका राजनीतिक उच्च पदस्थ व्यक्तिहरूलाई स्तब्ध बनाएको छ । समाचार सस्था रोयटर्सको अनुसन्धान अनुसार, यी भिसा रद्दहरू पहिले अनुमान गरिएभन्दा निकै व्यापक छन् ।
तीन जना पूर्व अमेरिकी राजदूतहरूले सो प्रकाशनलाई बताए अनुसार, अघिल्ला प्रशासनहरूले पनि यस्ता भिसा रद्द गरेका थिए, तर हालको जति स्तरमा कहिल्यै भएको थिएन । उनीहरूका अनुसार यसले राष्ट्रपति डोनाल्ड ट्रम्पले आफ्नो नीतिगत लक्ष्य हासिल गर्न कूटनीतिक उपाय प्रयोग गर्न तयार रहेको देखाउँछ ।
हालसम्म केवल चार जना अधिकारीहरूले मात्र सार्वजनिक रूपमा आफ्नो भिसा रद्द भएको पुष्टि गरेका छन् । तिनीहरूमध्ये बाजा क्यालिफोर्नियाकी राज्यपाल मरिना डेल पिलार अविला पनि छिन्, जसको भिसा मे महिनामा रद्द गरिएको थियो । उनले संगठित अपराधसँग कुनै सम्बन्ध नभएको दाबी गरेकी छन् ।
अमेरिकी विदेश विभागका एक वरिष्ठ अधिकारीले रोयटर्सलाई दिएको वक्तव्यमा भनेका छन “भिसा, जसमा विदेशी अधिकारीहरूले लिएका भिसा पनि समावेश छन्, अमेरिकी राष्ट्रिय हितविपरीत गतिविधि भएमा कुनै पनि समयमा रद्द गर्न सकिन्छ ।” उक्त अधिकारीले भनेका छन ती गतिविधिहरूमा मादक पदार्थ तस्करी, भिसा अवधि नाघ्ने, भ्रष्टाचार, गुप्तचर गतिविधि वा अवैध आप्रवासनमा सहयोग जस्ता कार्यहरू पर्दछन् ।
