क्यालिफोर्निया राज्यले १७ हजार आप्रवासीको व्यावसायिक चालक अनुमतिपत्र (कमर्शियल ड्राइभर लाइसेन्स) रद्द गर्ने तयारी गरेको छ । ती चालकहरूको अमेरिकामा कानूनी बसाइ अवधि सकिने मिति नजिक भएकाले त्यो मिति भन्दा परको मितिसम्म लाइसेन्सको म्याद रहेकोले त्यस्ता १७ हजार लाईसेन्स रद्द गर्न लागिएको हो । राष्ट्रपति ट्रम्प प्रशासनले क्यालिफोर्निया तथा अन्य राज्यहरूलाई अवैध रूपमा देशमा बसेका व्यक्तिहरूलाई देश निकाला गर्ने अभियान अन्र्तगत त्यस्ता व्यक्तिहरुको लाईसेन्स खारेज गर्ने भएको हो । गत अगस्टमा अमेरिका बस्न नपाउने एक ट्रक चालकले फ्लोरिडामा अवैध यू–टर्न लिँदा भएको दुर्घटनामा तीन जनाको मृत्यु भए पछि यो विषय चर्चामा रहेको थियो ।
यातायात सचिव सीन डफीले बुधबार भने कि यी लाइसेन्स रद्द गर्ने क्यालिफोर्नियाको निर्णयले राज्यले पहिले आफ्नो मापदण्ड बचाउ गरे पनि गल्ती गरेको स्वीकार गरेको जनाउँछ । डफीले उठाएको चिन्तापछि क्यालिफोर्नियाले आफ्नो व्यावसायिक चालक अनुमतिपत्रहरूको समीक्षा सुरु गरेको थियो । त्यसमा ९० प्रतिशत मेक्सिकनहरु रहेको बताइएको छ । यातायात सचिवले गैरनागरिक ट्रक चालक लाइसेन्सका कारण क्यालिफोर्नियाबाट १६० मिलियन डलर हटाउने चेतावनी पनि दिएका छन । संघीय सरकारले ट्रक चालकहरूको अंग्रेजी मापदण्ड लागु नगरेको भन्दै क्यालिफोर्नियाबाट ४० मिलियन डलर रोकेका हुन ।
गर्भनर न्यु्समको कार्यालयले भने ती सबै चालकहरूसँग संघीय सरकारले दिएको वैध कार्य अनुमति (वर्क परमिट) रहेको बताएका छन । सुरुमा कार्यालयले लाइसेन्स किन रद्द गरिँदैछ भन्ने ठ्याक्कै कारण नबताई राज्य कानून उल्लङ्घन भएको मात्र बतायो । पछि खुलासा गरियो कि फाइल भएको विवरणअनुसार व्यक्तिको कानुनी बसाइ अवधि सकिने मितिभन्दा पर लाइसेन्सको म्याद राख्नु राज्य कानुनविरुद्ध हो । गतवर्ष टेक्सास र अलाबामामा भएका घातक ट्रक दुर्घटनाले पनि यस्ता लाइसेन्सप्रतिको प्रश्न उठाएका छन् । क्यालिफोर्नियामा गत महिना तीन जनाको ज्यान जाने गरी भएको दुर्घटनामा पनि अमेरिका बस्न नपाउने चालक संलग्न रहेको उल्ल्ेख छ ।
यस नयाँ कडा नियमका कारण आप्रवासीहरूलाई व्यावसायिक लाइसेन्स पाउन निकै कठिन बनाउँछ । नयाँ नियमअनुसार व्यावसायिक चालक अनुमतिपत्र पाउन आप्रवासीहरूबाट केवल तीन प्रकारका भिसा मात्र मान्य हुनेछन् । राज्यहरूले चालकको आप्रवासन स्थिति संघीय डेटाबेसमा जाँच गर्नुपर्नेछ । लाइसेन्स अधिकतम एक वर्षका लागि मात्र मान्य हुनेछ, यदि भिसा त्यसअघि सकिँदैन भने । यी नियम लागू हुनुअघि जारी गरिएका क्यालिफोर्नियाका १७ हजार लाइसेन्स भने पुरानै प्रणालीअनुसार जारी भएका थिए । ती चालकहरूलाई ६० दिनभित्र लाइसेन्सको म्याद सकिने सूचना दिइएको छ । समाचार एपी समाचारमा आधारित छ ।
