राहदानी भाव हुन नदिन सरकारले नयाँ उपाय निकालेको छ । नयाँ राहदानीका लागि लामो समय कुर्नुपर्ने अवस्था अन्त्य गर्न सरकारले तीन साताभित्र आपूर्ति गराउने व्यवस्था गरेको जनाएको हो । अन्यथा राहदानी अभावका कारण जनतामा आक्रोस पैदा भएको थियो । आपूर्तिकर्ता कम्पनीसँग थप ७ लाख विद्युतीय राहदानी खरिद सम्झौता गरिएकोमा आगामी तीन साताभित्र पहिलो किस्ता आउने व्यवस्था गरिएको राहदानी विभागले जनाएको छ। प्रधानमन्त्री सुशीला कार्कीले नेपालका लागि जर्मन राजदूतदेखि सम्बन्धित कम्पनीका अधिकारीहरूलाई बोलाएर नयाँ राहदानी छिटो आपूर्ति गर्न आग्रह गरेपछि तत्काल केहि राहदानी आपुर्ति हुन लागेको हो की । यसो हुँदा तत्कालललाई राहदानी अभाव नहुने देखिन्छ ।

विभागले शुक्रबार विज्ञप्ति जारी गरी समयमै राहदानी उपलब्ध नहुने समस्या समाधान गर्न उक्त व्यवस्था गरेको जनाएको हो। पहिलो किस्तापछि क्रमश थप राहदानी आपूर्ति गरिने विभागको विज्ञप्तिमा छ। यसअघि राहदानीको मौज्दात सकिँदै गएको र वैकल्पिक व्यवस्था गर्न नसकेका कारण दैनिक एक हजारको दरले मात्र नयाँ उपलब्ध गराइँदै आएको थियो। नवीकरण गर्नुपर्ने र नयाँ लिनुपर्ने गरी दैनिक करिब ६ हजार राहदानीको माग छ। सरकारले त्यसको एकचौथाइ पनि उपलब्ध गराउन नसक्दा सेवाग्राहीहरू समस्यामा थिए।