अमेरिकाको मेरिल्यान्ड राज्यको हाउस अफ डेलिगेट्सको लागि भइरहेको प्राइमरी चुनावमा नेपाली मूलका उमेदवार सतिश चापागाईंले उम्मेदवारी दिएका छन । आगामी नोभेम्बर महिनामा हुने चुनावका लागि डेमोक्रेटिक पार्टीबाट मेरिल्यान्ड राज्यको डिस्ट्रिक्ट ७ ए को प्रतिनिधित्व गर्दै उमेदवार बन्न पार्टीको आगामी जुन २३ मा हुने पार्टीको आन्तरिक चुनावमा चापागाईंले तयारी गरिरहेको बताएका छन । उनको यो चुनावी अभियानमा नेपाली मूलका सफल र अनुभवी राजनीतिज्ञ एवम् मेरियान्ड राज्यको सांसद ह्यारी भण्डारीले अनुमोदन इन्डोर्स गरिसकेका छन भने चुनावी तयारीमा डा भण्डारीले सहयोग जारी राखेका छन् ।
नेपाली मूलका व्यक्तिहरु अमेरिकाको मूलधारको राजनीतिमा आउनु उत्साहजनक र साहसिक कदम भएको मेरिल्यान्ड राज्यको हाउस अफ डेलिगेट्को सांसद ह्यारी भण्डारीले बताएका छन् । डेमोक्रेटिक पार्टीमा निरन्तर आस्था राख्ने चापागाईं चारवर्ष अगाडि मेरिल्यान्ड राज्यको उक्त पार्टीको केन्द्रिय समितिमा निर्वाचित सदस्य हुन् । यसअघि उनी एसियन अमेरिकन प्यासिफिक आइल्यान्डर समितिमा रहेका थिए । जुन २३ मा हुने चुनावबाट डेमोक्रेटिक पार्र्टीका दुइजना उम्मेदवारहरु छानिनेछन् जसले रिपब्लिकन पार्टीका उमेदवारहरुसँग हाउस अफ डेलिगेट्सको सांसद बन्न प्रतिस्पर्धा गर्नेछन् ।
यो आन्तरिक चुनावमा चापागाईंका डेमोक्रेटिक पार्टी कै समकक्षी प्रतिस्पधीहरु टम बेकर, लिडिया ब्राउन र क्लिभल्यान्ड रेनोल्ड्स जुनियर प्रतिस्पधामा रहेका छन ।
यो चुनावका लागि अर्ली मतदान सुरु भइसकेको छ भने अन्तिम चुनाव जुन २३ मा हुने छ मेरील्यान्ड स्टेट बोर्ड अफ इलेक्सन्सले जनाएको छ । उमेदवार चापागाईंका अनुसार डिस्ट्रिक्ट ७ ए मा कूल ८० हजार मतदातामध्ये ३४ प्रतिशत डेमोक्रेटिक पार्टीका मानिसहरु रहेका छन् । अमेरिकामा रहेका नेपाली समूदायसँग गैर आवासीय नेपाली संघ अमेरिका र नेपाल अमेरिका पत्रकार संघको माध्यमबाट विगतदेखि जोडिएका चापागाईं मेरिल्यान्ड राज्यको हाउस अफ डेलिगेट्सका सांसद ह्यारी भण्डारीको चुनावी अभियानका बेला सक्रिय सहभागी भएका थिए ।
नेपालमा रहेर लामो समय पत्रकारितामा जोडिएका चापागाईं नेपाल प्रेश यूनियनमा केन्द्रिय समितिमा काम गरेका थिए । राजनीतिमा भने सन् २०१४ देखि नै सक्रिय भएका हुन्। सुरूमा स्वतन्त्र’ रहेका उनी पछि डेमोक्र्याटिक पार्टीसँग आबद्ध भए । १८ बर्ष अघि अमेरिका आएका चापागाईं नेपालमा रहँदा सामूदायिक तथा ग्रामिण पत्रकारिता गरेका उनी जनताको दुःखलाई नजिकबाट केलाएका चापागाई अमेरिकाका नेपाली समूदायसँग उनी नेपालीडायास्पोरा डटकम नामको न्यूजपोर्टलका संचालक पनि हुन । स्थानीय नेपाली समुदाय चपागाईको चुनावी अभियानमा सहभागी भएका छन ।
