विश्व फुटबल फिफा अन्तर्गत प्रशिक्षकहरुले प्राप्त गर्ने ‘फिफा–प्रो’ लाइसेन्स प्राप्त गर्ने पहिलो नेपाली प्रशिक्षकमा प्रदिप हुमागाँईले आफ्नो नाम दर्ज गराएका छन् । प्रदिपले १६ महिनाको लामो अध्ययन पछि हिजो (मंगलबार) अर्जेन्टिनाबाट फिफा प्रो लाइसेन्स प्राप्त गर्न सफल भएको पोखरा स्पोर्टसलाई जानकारी दिएका हुन् । हाल अमेरिकामा बसेर फुटबल प्रशिक्षण संगै अध्ययनमा व्यस्त ४३ वर्षिय हुमागाईले अब आफ्नो लक्ष्य नेपाली राष्ट्रिय फुटबल टिमलाई सम्हाल्ने रहेको बताए ।
धेरैको मायाँ र आर्शिवादका कारणले नै आफूले यो महत्वपूर्ण उपलव्धि हासिल गर्न सकेको बताउँदै हुमागाँइले भने–“मैले १६ महिना लामो अध्ययन पश्चात फुटबलमा नयाँ अध्याय पार गरेको छु । मेरो लक्ष्य नेपाली राष्ट्रिय फुटबल टिम सम्हाल्ने नै हो”, उनले थपे–“यो विषय मैले मात्र भनेर हुँदैन । अहिले पनि पास आउट हुने वित्तिकै धेरै अन्तर्राष्ट्रिय क्लबहरुको नजरमा परेको पनि छु । तर मेरो चाहना भनेको नेपाली फुटबलको विकास नै हो ।” हुमागाईले सन २००९ बाट फुटबल प्रशिक्षकको रुपमा आफ्नो जिवन सुरुवात गरेका थिए ।
१५ वर्षको लामो अध्ययन विभिन्न क्लवहरुमा प्रशिक्षणको जिम्मेवारी सम्हाल्दै उनले नेपालबाट एफसी ‘बि’ र ‘ए’ क्याटोगोरीको लाइसेन्स समेत प्राप्त गरेका थिए । सन २००३ मा काठमाण्डौमा भएको बंगलादेश संगको मैत्रीपूर्ण खेलमा उनको प्रशिक्षणमा रहेको नेपाली राष्ट्रिय टिमले ३–१ ले जित हात पारेको थियो । काठमाण्डौ विश्वविद्यालय अन्तर्गतको मावीमा महिला प्रशिक्षकको रुपमा सुरुवात गरेका हुमागाईले नेपाली ए डिभिजनको क्लब थ्रि स्टार क्लब, ललितपुर एफसी, भुटनिज यूथ स्पोर्टस क्लब अमेरिकालगायतको टोली प्रशिक्षण दिएको अनुभव संगालेका छन् । अमेरिकी भुटनिज यूथ स्पोर्टस क्लब आहा रारा गोल्डकपमा उपविजेता बनेको थियो भने बागमती कपमा उपाधि बिजेता रहेको थियो ।
