विश्वको प्रतिष्ठित फिल्म फेस्टिभलमा बलियो उपस्थिति जनाएको फिल्म ‘शाम्बाला’ले फेरि अर्को नयाँ अवार्ड जितेको छ । टर्कीको १२ औं बोसफोरस अन्तर्राष्ट्रिय फिल्म महोत्सवमा निर्देशक मीनबहादुर भामले ‘उत्कृष्ट निर्देशक’को अवार्ड जितेको हो ।
यसअघि लोकार्नोमा अवार्ड जितिसकेकी अभिनेत्री थिन्ले ल्हामोले पनि यो महोत्सवमा अवार्ड जितेकी छन् । निर्देशक भामसँगै अभिनेत्री थिन्लेले उत्कृष्ट अभिनेत्रीको अवार्ड उचालेकी हुन् ।
बर्लिनको प्रमुख विधातर्फ छनौट हुने पहिलो नेपाली फिल्मको इतिहास रचेको यो फिल्ममा आफ्नो पतिको खोजीमा हिँडेकी पत्नी पेमाको यात्रा प्रस्तुत गरिएको छ । फिल्ममा थिन्लेसँगै अभिनेता कर्मा, सोनम तोप्देनलगायतको अभिनय छ । फिल्म अहिले क्युएफएक्स हलमा प्रदर्शनरत छ ।
