रोजगारीको सिलसिलामा पोर्चुगलमा एक रेष्टुरेन्टमा काम गर्दै आएका नेपाली युवा केहि समयदेखि बेपत्ता भएको समाचार छ । नेपाल घर कैलालीस्थित धनगढी उपमहानगरपालिका–१२ का २८ वर्षीय सुरेशकुमार ओझा चार महिनादेखि बेपत्ता भएको एनआरएन पोर्चुगलले जनाएको छ । उनि पोल्यान्ड हुँदै दुई वर्ष अघि पोर्चुगल पुगेका ओझा गत जुलाई ५ तारिखदेखि सम्पर्कविहीन भई बेपत्ता भएको सुदूरपश्चिमेली नेपाली समाज पोर्चुगलका अध्यक्ष दीपेश विष्टले जानकारी दिएपछि खोजी अभियान शुरु गरिएको छ ।
पोर्चुगलको राजधानी लिस्बनस्थित एक रेष्टुराँमा काम गर्दै आएका उनी ६ महिनाअघि एकाएक बेवारिसे भएका थिए । बेवारिसे भएका ओझालाई मेट्रो स्टेसनबाट नाजुक अवस्थामा उद्धार गरी लिस्बनस्थित एक होस्टेलमा खाने बस्ने व्यवस्था मिलाएर राखिएको भए पनि होस्टेलबाटै भागेर बेपत्ता भएको विष्टले जानकारी दिएका छन । पछिल्लो समय मकाउ, माल्टा लगायत यूरोप नजिकका अन्य देशहरुबाट पनि यूरोप छिर्ने लहडका कारण धेरै नेपालीहरुले दुख भोग्न बाध्य भएको बताईन्छ ।
