साउथ अस्ट्रेलिया सरकारले नेपाली चेली मञ्जु खड्कालाई महत्त्वपूर्ण मानिने बहुसांस्कृतिक आयोगमा पुनः आगामी तीन वर्षका लागि नियुक्त गरेको छ।
आयोगमा खड्कासहित १५ जनालाई नियुक्त गरेको हो । साउथ अस्ट्रेलियामा दुई सयभन्दा बढी समुदाय रहेकोमा तिनै समुदायहरूमा क्रियाशीलहरूमध्येबाट १५ जनाको आयोग सरकारले निर्माण गर्ने गरेको छ। तीनवर्षे कार्यकाल रहने आयोगले साउथ अस्ट्रेलियामा रहेका आप्रवासीहरूको सरकारसँगका अपेक्षा अनि उनका सांस्कृतिक विविधताको संरक्षणका लागि सुझाव दिने गर्दछ।
तीनवर्षे कार्यकाल रहने आयोगले साउथ अस्ट्रेलियामा रहेका आप्रवासीहरूको सरकारसँगका अपेक्षा अनि उनका सांस्कृतिक विविधताको संरक्षणका लागि सुझाव दिनेका लागि विविधता समावेस गरी नियूक्ति गर्ने गर्दछ। सरकारले आयोगको सिफारिसमा यहाँका विभिन्न समुदायकेन्द्रित नीति तथा बजेटको निर्माण गर्ने गर्दछ। राज्य सरकारले आयोग गठनका लागि सार्वजनिक रूपमा इच्छुकहरूका लागि दरखास्त आह्वान गर्दा दरखास्त दिनेहरूको छनोटका लागि गठित स्वतन्त्र आयोगले शैक्षिक योग्यतासहित सामाजिक पृष्ठभूमि, क्रियाशीलताबारे अध्ययन गरेर अध्यक्षसहित १५ जनाको छनोट गरेको बताइएको छ ।
सन् २०१४ मा अस्ट्रेलिया पुग्नु भएकी खड्का सामाजिक क्षेत्रमा क्रियाशील हुँदै स्थानीय म्यारियन काउन्सिलबाट सामुदायिक नेतृत्व विकासको कोर्स गरेर काउन्सिलको सामुदायिक गतिविधि मूल्यांकन टिममा रहेर काम गरेकी थिइन्। एडिलेड नेपाली विद्यालयकी संस्थागत प्राचार्यसमेत रहेकी खड्का सन् २०१९ मा एनआरएनए नारी निकुञ्ज साउथ अस्ट्रेलिया र २०२१ मा नारी निकुञ्ज अस्ट्रेलियाको संयोजकको समेत जिम्मेवारी सफतापूर्वक निर्वाह गरेकी उनको यो दोश्रो कार्यकाल हो ।
