हाल नेपालमा कुल ३७ वटा बीमा कम्पनी सञ्चालनमा छन्। नेपाल बीमा प्राधिकरणको स्वीकृतिमा १४ वटा जीवन बीमा, १४ वटा निर्जीवन बीमा, ७ वटा लघु बीमा र २ वटा पुनर्बीमा कम्पनी सञ्चालनमा रहेका हुन्। प्राधिकरणको तथ्यांकअनुसार करिब ५० प्रतिशत जनसंख्या बीमाको दायरामा आएका छन्।
नेपालमा वित्तीय सेवाहरुको डिजिटल रुपान्तरण दैनिक जीवनको एउटा हिस्सा बनेको छ। बीमाको दायरा बढ्दै जाँदा डिजिटल प्रक्रियामा ग्राहकको रुचि बढ्न थालेको छ। मानिसहरु आफ्नो मोबाइल फोनमा लेनदेन गर्ने, बिल भुक्तानी गर्ने, किनमेल गर्ने र विभिन्न सेवाहरु पूरा गर्ने बानी परेका छन्। यो परिवर्तनसँगै अपेक्षाहरु पनि परिवर्तन भएका छन्।
अब ग्राहकले द्रुत सेवा, स्पष्ट जानकारी र सजिलो सञ्चारलाई सामान्य मापदण्डका रुपमा लिन्छन्। यदि बीमा उद्योग अझै पनि कागजी कार्य, म्यानुअल प्रमाणीकरण र लामो प्रक्रियाहरुमा भर पर्छ भने यो विश्वास र प्रतिस्पर्धा दुवैमा पछाडि पर्ने जोखिम हुन्छ। त्यसकारण बीमा सफ्टवेयर केवल आधुनिकीकरणको कुरामात्र नभएर यो बीमा क्षेत्रको दिगो प्रगतिका लागि एउटा महत्वपूर्ण पूर्ववर्त हो।
नेपालको सन्दर्भमा बीमा सेवा डिजिटलाइजेसन उन्मुख रहे पनि अझै पनि सेवाग्राहीहरुले कागजी प्रक्रिया पूरा गर्नुपर्ने बाध्यता रहेको छ। यो अवस्थामा बीमा सफ्टवेयरले एउटा एकीकृत डिजिटल प्रणालीलाई जनाउँछ। जहाँ बीमालेख निर्माण व्यवस्थापन, जोखिम मूल्यांकन, बीमाशुल्क संकलन, बिलिङ, दाबी प्रशोधन, कागजात भण्डारण, रिपोर्टिङ र ग्राहक सेवा एकैसाथ व्यवस्थित गरिन्छ।
एकीकृत डिजिटल प्रणालीको मुख्य विशेषता भनेको बीमा सेवालाई अनुशासित ढंगले प्रवाह गर्नु हो। जसका माध्यमबाट कम्पनीले छिटो निर्णय लिन सक्ने र ग्राहक सेवा अझ पारदर्शी हुनु पनि हो।
नेपालमा डिजिटलाइजेसनको बढ्दो प्रयासको पछाडिको सबैभन्दा ठूलो कारण बीमा दाबी अनुभव हो। घाटा हुँदा र दाबीको समाधान गर्न आवश्यक पर्दा बीमामा ग्राहकको विश्वासको सबैभन्दा बढी परीक्षण हुन्छ।
दीर्घकालीन अस्पष्ट नियमहरु, दोहोरिने कागजी कार्य वा अद्यावधिकको अभावले प्रायः बीमामा विश्वास गुमाउन सक्छ। बीमा सफ्टवेयरले यस सन्दर्भमा वास्तविक फरक पार्न सक्छ। किनकि दाबी पेस गर्ने, प्रमाणीकरण, स्वीकृति र भुक्तानीबाट सबै चरणहरु ट्रयाक गर्न सकिन्छ। यसले समय घटाउँछ, सञ्चारलाई सरल बनाउँछ र गुनासाका सम्भावना घटाउँछ। योसँगै बीमा धोखाधडीका घटना पनि न्यूनीकरण हुँदै जान्छ।
